ကိုဗစ်ကပ်ရောဂါအကြောင်းပြချက်ဖြင့် အာဏာသိမ်းစစ်ကောင်စီက နံနက် ၁၀ နာရီမှ ညနေ ၄ နာရီအထိ နေ့မထွက်ရအမိန့်ထုတ်ပြန်မှုအပေါ် မလိုက်နာဘဲ အာဏာဖီဆန်ကြရန် မုံရွာပင်မသပိတ်ခေါင်းဆောင်တစ်ဦးက ယနေ့လိုက်လံဟောပြောခဲ့သည်။
‘မုံရွာမြို့ဟာ ကပ်ရောဂါအကြောင်းပြ၍ မနက်ဆယ်နာရီမှ ညနေလေးနာရီအမိန့်ထုတ်ပြန်ခံထားရသည်ဖြစ်ပြီး ၄င်းအမိန့်မှာ အကြမ်းဖက်စစ်ကောင်စီ၏ မတရားအမိန့်သာဖြစ်သဖြင့် လိုက်နာရန်မလိုအပ်ပဲ မိမိကျန်းမာရေးအတွက်သာ ဂရုစိုက်ကာကွယ်၍ မိဘပြည်သူများအားလုံး ပုံမှန်အတိုင်းသွားလာလှုပ်ရှားကြရန် တိုက်တွန်းပြောကြားခဲ့သည်’ဟု ပြည်သူ့ မီဒီယာ ကွန်ယက်မုံရွာက ထုတ်ပြန်သည်။
မုံရွာခရိုင်ကို စစ်ကောင်စီက ကိုဗစ်ကပ်ရောဂါထိန်းချုပ်ရေးအကြောင်းပြချက်ဖြင့် သြဂုတ် ၁၄ ရက်ကစပြီး မရှိမဖြစ်စားသောက်ကုန်များ၊လူသုံးကုန် ပစ္စည်းအရောင်ဆိုင်များအပါအဝင် ဆိုင်အားလုံး နံနက် ၁၀ နာရီမှ ညနေ ၄ နာရီအထိပိတ်ထားကြရန် အမိန့်ထုတ်ပြန်ထားသည်။
