မိုးကုတ်မြို့ အနောက်ပိုင်း အောင်သစ်လွင်ရပ်ကွက်က ဒီနေ့မနက်ပိုင်း မြေပြိုမှုဖြစ်စဉ်မှာ ပိတ်မိနေတဲ့သူ ၁၁ ဦးကို ကယ်ဆယ်ရေးအဖွဲ့တွေက သေဆုံးလျှက် ရှာဖွေတွေ့ရှိခဲ့တယ်လို့သိရပါတယ်။
ရှာဖွေကယ်ဆယ်ရေးလုပ်ငန်းဟာ ခက်ခက်ခဲခဲလုပ်ဆောင်ခဲ့ရပြီး ၉ နာရီနီးပါးကြားမြင့်ခဲ့တာပါ။
အောင်သစ်လွင်ရပ်ကွက်မှာ ဒီနေ့မနက်ပိုင်း ၇ နာရီမထိုးခင်ကေ တာင်ကမ်းပါးယံဟာ နေအိမ်အချို့ပေါ် ပြိုကျခဲ့တာဖြစ်ပါတယ်။
ဒီ မြေပြိုကျမှုကြောင့်နေအိမ် ၃ လုံးပျက်စီးခဲ့ရပြီး ကယ်ဆယ်ရေး လုပ်ငန်းတွေကို ဆောင်ရွက်ရာမှာ အခင်းဖြစ်ပြီး နာရီဝက်ကျော်အကြာမှာ ကလေး ၂ ဦးအပါအဝင် သေဆုံးသူ ၃ ဦးကို ကနဦးတွေ့ရှိခဲ့ပါတယ်။
အဲဒီအချိန်မှာ ပိတ်မိနေသူ ၁၀ ဦးထက်မနည်းရှိနေခဲ့တာကို သိရတယ်လို့ မြန်မာနိုင်ငံ လူမှုကယ်ဆယ်ရေးအဖွဲ့ (မိုးကုတ်မြို့နယ်)ရုံး သတင်းနဲ့ပြန်ကြားရေးက ကိုဟိန်းထက်မောင်ကပြောပါတယ်။
ဒါကြောင့်ပိတ်မိနေသူတွေကို ဆက်လက်ရှာဖွေကယ်ဆယ်ရေးလုပ်ရာမှာ ညနေ ၄ နာရီခွဲလောက်မှာ ကယ်ဆယ်ရေးလုပ်ငန်းတွေပြီးဆုံးခဲ့ပြီး ပိတ်မိနေသူ ၁၁ ဦး ကို သေဆုံးလျှက်တွေ့ခဲ့ရတယ်လို့ ကိုဟိန်းထက်မောင်ဆီကသိရပါတယ်။
ဒါကြောင့် ဒီမနက်က မြေပြိုမှုဖြစ်စဉ်ကြောင့် မနက်ပိုင်းက သေဆုံးသူ ၃ ဦးအပါအဝင် စုစုပေါင်းသေဆုံးသူဟာ ၁၄ ဦးထိရှိသွားပါတယ်။ အခုတော့ သေဆုံးသူတွေရဲ့ ရုပ်အလောင်းကို ရင်ခွင်ရုံဆီပို့ဆောင်လိုက်ပါပြီ။
ဒီမြေပြိုမှု မဖြစ်ခင် ပြီးခဲ့တဲ့ ရက်ပိုင်း သြဂုတ် ၁၂ နဲ့ သြဂုတ် ၁၃ ရက်တွေ ကလည်း မိုးကုတ်မြို့မှာ မြေပြိုမှု နှစ်ကြိမ် ဆက်တိုက်ဖြစ်ခဲ့ပါတယ်။ အဲဒီဖြစ်စဉ်တွေမှာတော့ ကလေး ၁ ဦးအပါအဝင် ၄ ဦးသေဆုံးခဲ့တာရှိခဲ့ပါတယ်။
မိုးကုတ်မှာ မြေပြိုမှုအန္တရာယ်ရှိတာကြောင့် တောင်ကုန်းတွေနားနေထိုင်သူတွေကို လူမှုကူညီရေးအသင်းတွေက သတိပေးထားခဲ့ပါတယ်။