မြန်မာနိုင်ငံအလယ်ပိုင်း စစ်ကိုင်းတိုင်း၊ ရွှေဘို ခရိုင်ထဲက ဝက်လက်မြို့ နယ် အရှေ့ပိုင်းမှာ စစ်ကောင်စီတပ်ဖွဲ့ဝင်တွေနဲ့ ဝက်လက် PDF တို့ ၂ ရက် ဆက်တိုက် တိုက်ပွဲတွေဖြစ်ပွားရာ စစ်ကောင်စီတပ်တွေအထိနာလို့ လေကြောင်းပစ်ကူသုံးရတဲ့အထိဖြစ်သွားခဲ့ပါတယ်။
တိုက်ပွဲဟာ ဒီဇင်ဘာလ ၃၁ ရက် မွန်းလွဲ ၂ နာရီ လောက်က ဝက်လက်အရှေ့ခြမ်း၊ ဘုရားလေးကုန်းကျေးရွာထဲ တပ်စွဲထားတဲ့ စစ်ကောင်စီတပ်ဖွဲ့ဝင် ၇၀ လောက် နဲ့အပြန်အလှန်ပစ်ခတ်ရာကနေ စတင်ခဲ့တာပါ။
အဲဒီတိုက်ပွဲက ၂ နာရီလောက်ကြာမြင့်ခဲ့ပြီး စစ်ကောင်စီတပ်ဖွဲ့ဝင် ၁၂ ဦးလောက်သေသွားတယ်လို့ ဝက်လက်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်ထားပါတယ်။
အဲဒီနောက် ဇန်နဝါရီ ၁ ရက်မနက်ပိုင်းမှာ စစ်ကောင်စီတပ်တွေက ရွာထဲကအိမ်တွေကိုမီးရှို့တာကြောင့် PDF တပ်တွေက မနက် ၁၁ နာရီလောက်မှာ စတင်ပစ်ခတ်ခဲ့တယ်လို့ သိရပါတယ်။ မနက် ၆ နာရီ လောက်ကစတဲ့ အဲဒီဒုတိယအကြိမ်တိုက်ပွဲဟာ ညနေ ၅ နာရီ အထိ အပြန်အလှန်ပစ်ခတ်မှုတွေနဲ့ပြင်းထန်ခဲ့တာဖြစ်ပါတယ်။
Public Service Announcement
ညနေ ၆ နာရီလောက်မှာတော့ စစ်ကောင်စီရဲ့တိုက်ခိုက်ရေးရဟတ်ယာဉ် ရောက်လာပြီး ဘုရားလေးကုန်း ကျေးရွာအနီးတဝိုက်ကို လေကြောင်းပစ်ကူပေးကာ စစ်ကောင်စီတပ်တွေကို ဆွဲထုတ်သွားခဲ့တာပါ။
ဒီလို လေကြောင်းကပစ်ကူတာကြောင့် စစ်ကောင်စီတပ်တွေ လွတ်မြောက်သွားတာလို့ ဝက်လက် PDF က ဆိုပါတယ်။
၂ ရက်ဆက်တိုက်ဖြစ်ပွားတဲ့ တိုက်ပွဲမှာ စစ်ကောင်စီတပ်ဖွဲ့ဝင် ၄၀ ဦးလောက် သေဆုံးတယ်လို့ ဝက်လက် PDF က ခန့်မှန်းထားပြီး လေကြောင်းကတိုက်ခိုက်မှုကြောင့် PDF တပ်ဖွဲ့ဝင် တစ်ဦးကျဆုံးခဲ့တယ်လို့သိရပါတယ်။
တိုက်ပွဲတွေမဖြစ်ခင်ကတော့ ဝက်လက်မြို့နယ်အခြေခြမ်းမှာ ပျုစောထီးနဲ့ စစ်ကောင်စီတပ်တွေ ခြေရှုပ်နေတာပြီး အချိန်မရွေးတိုက်ပွဲဖြစ်နိုင်တဲ့အကြောင်းဒေသကာကွယ်ရေးတပ်တွေက ပြည်သူတွေကိုသတိပေးတာမျိုး ရှိခဲ့ပါတယ်။
ဒါအပြင် ဝက်လက် မြို့နယ်အရှေ့ခြမ်းက ပြည်သူတွေအနေနဲ့ PDF တွေကို လေသံလုံလုံနဲ့အားပေးကြဖို့ကိုလည်း ဒေသခံဝက်လက် PDF က တိုက်တွန်းထားတာတွေ့ရပါတယ်။
စစ်အာဏာသိမ်းမှုကိုအပြင်းထန်ဆုံးဆန့်ကျင်တော်လှန်နေတဲ့ စစ်ကိုင်းတိုင်းမှာ စစ်ကောင်စီတပ်တွေဟာ နယ်မြေရှင်းလင်းရေးဆိုပြီး စစ်ဆင်ရေးတစ်ရပ်ကိုဆင်နွှဲနေတာဖြစ်ပြီး လေကြောင်းကနေပါ တိုက်ခိုက်တာတွေ လုပ်နေတာဖြစ်ပါတယ်။
ဒါပေမယ့် ဒေသကာကွယ်ရေးတပ်တွေရဲ့ နယ်မြေကျွမ်းကျင်မှုကိုမယှဉ်သာတာကြောင့် စစ်ကောင်စီတပ်တွေအထိနာနေတာလည်းဖြစ်ပါတယ်။
