အမေရိကန် နိုင်ငံမှာ တစ်နေ့တည်းနဲ့တင် ကိုဗစ်ရောဂါ ကူးစက် လူနာသစ် တစ်သန်းကျော် တိုးပွားခဲ့ကြောင်း သိရပါတယ်။
ဂျွန်ဟော့ပ်ကင်းစ် တက္ကသိုလ်က ထုတ်ပြန်တဲ့ အချက်အလက်တွေမှာ ဇန်နဝါရီ ၃ ရက်က ၂၄ နာရီအတွင်း ကိုဗစ် လူနာသစ် တစ်သန်းကျော် တိုးပွားခဲ့ကြောင်း ဖော်ပြ ပါရှိပါတယ်။ ၂၀၁၉ နှစ်ကုန်ပိုင်းက အစပြုခဲ့တဲ့ ကပ်ရောဂါ ကာလနောက်ပိုင်း ဘယ်နိုင်ငံမှ နေ့အလိုက် ကူးစက်နှုန်း သန်းဂဏန်းထိ များပြားတာမျိုး အရင်က မကြုံခဲ့ဖူးသေးပါဘူး။
ကူးစက်နှုန်း မြန်ဆန်တဲ့ Omicronမျိုးကွဲ ကိုရိုနာဗိုင်းရပ်စ် ပျံ့နှံ့မှုတွေနဲ့အတူ အမေရိကန်ရဲ့ နေ့အလိုက် ကူးစက်လူနာ ဦးရေက တစ်နေ့ချင်းစီ အရှိန်အဟုန်နဲ့ တိုးပွားလာနေပါတယ်။ လွန်ခဲ့တဲ့ ၄ ရက်က တစ်နေ့တည်းနဲ့ လူနာသစ် ၆ သိန်းနီးပါး တိုးလာပြီး စံချိန်သစ် ဖြစ်ခဲ့ဖူးရာက အခုလို နေ့အလိုက် ကူးစက်နှုန်း တစ်သန်းကျော်ထိ ဖြစ်လာခဲ့တာပါ။
အမေရိကန် ပြင်ပမှာ နေ့အလိုက် ကူးစက်နှုန်း အမြင့်ဆုံး စံချိန် တင်ခဲ့ဖူးတာက အိန္ဒိယမှာပါ။ မေလ ၇ ရက်က Deltaမျိုးကွဲ ကိုရိုနာဗိုင်းရပ်စ် ကူးစက်မှုတွေ အားအကောင်းဆုံး ဖြစ်နေချိန် အိန္ဒိယမှာ တစ်နေ့တည်းနဲ့ ကိုဗစ်လူနာသစ် ၄ သိန်း ၁ သောင်းကျော် တိုးပွားခဲ့ဖူးပါတယ်။
Public Service Announcement
Omicronဟာ ကိုဗစ်ရောဂါ ဖြစ်ပွားစေတဲ့ Sars-Cov-2 ကိုရိုနာ ဗိုင်းရပ်စ်ရဲ့ မျိုးကွဲ အားလုံးထဲမှာ ကူးစက်နှုန်း အမြန်ဆုံးအဖြစ် ပညာရှင်တွေက လက်ခံထားပါတယ်။ Omicronကြောင့် ရောဂါလက္ခဏာ ပြင်းထန်သူ အချိုးအစားက တခြား ကိုရိုနာဗိုင်းရပ်စ် မျိုးကွဲတွေနဲ့ ယှဉ်ရင် နည်းပါးပေမယ့် လူနာဦးရေ အရမ်းများလာတဲ့ အခါမှာတော့ တချို့နိုင်ငံတွေရဲ့ ကျန်းမာရေး စောင့်ရှောက်မှု စနစ်တွေ အကြီးအကျယ် ဖိအားဝင်သွားနိုင်တယ်လို့ ကမ္ဘာ့ကျန်းမာရေး အဖွဲ့ကြီး (WHO)က သတိပေးထားပါတယ်။
အမေရိကန်မှာ ကိုဗစ်ရောဂါ ကူးစက်မှုတွေ အရမ်းများနေပေမယ့် သေနှုန်းကတော့ တဟုန်ထိုး တက်လာတာမျိုး မတွေ့ရသေးပါဘူး။ Omicronကြောင့် အမေရိကန်မှာ လေကြောင်းခရီး သွားလာမှုတွေကို ကန့်သတ် ဆိုင်းငံ့တာမျိုးတွေ ရှိနေပြီး ကာကွယ်ဆေး Booster ထပ်ထိုးရေး ကိစ္စတွေလည်း အရှိန်မြှင့် လုပ်ဆောင်နေပါတယ်။
