သင်္ကြန် ရောက်ဖို့ သုံးရက်ပဲလိုတော့ချိန်မှာ စစ်ကောင်စီက ရန်ကုန်မြို့တွင်းမဏ္ဍပ်တွေကို အပူတပြင်းဆောက်လုပ်နေတာတွေ့ရပါတယ်။
ပြီးခဲ့တဲ့ရက်က ရန်ကုန်တိုင်းအစိုးရရုံးရှေ့ ပြည်သူ့ရင်ပြင် အပြင်ဘက်မှာ ဆောက်လုပ်နေတဲ့ မဏ္ဍပ်တွေကိုလည်း ပြည်သူ့ရင်ပြင်အတွင်း ပြောင်းဆောက်နေတာကိုလည်းတွေ့ရပါတယ်။
အဲဒီမဏ္ဍပ်တွေဆောက်နေတဲ့ရက်က ရန်ကုန်မြို့တော်ဝန်မဏ္ဍပ်အနီး ဗုံးပေါက်ခဲ့တာကြောင့် မဏ္ဍပ်တွေကို ပြည်သူ့ရင်ပြင်အတွင်း ရွှေ့ပြောင်းခြင်းဖြစ်နိုင်တယ်လို့ သုံးသပ်နေတာလည်းရှိပါတယ်။
ဗုံးပေါက်မှုဖြစ်ခဲ့တဲ့ ရန်ကုန်မြို့တော်ဝန်မဏ္ဍပ်ရှိရာ လမ်းမကြီးကိုလည်း စစ်ကောင်စီက ပိတ်ထားပြီး ပြင်ဆင်တာတွေဆက်လုပ်နေပါတယ်။
စစ်ကောင်စီက လူစည်ကားတဲ့ နေရာတွေမှာ မဏ္ဍပ်ဆောက်လုပ်ဖို့ ညွှန်ကြားထားတယ်လိုဆိုပေမယ့် ရန်ကုန်မြို့လယ် အနော်ရထားလမ်းပေါ်မှာ ရေကစားမဏ္ဍပ်နှစ်ခုပဲ ဆောက်နေတာတွေ့ရပါတယ်။
၂၇ လမ်း နဲ့ ဘိုကလေးဈေးမှာ စစ်ကောင်စီတပ်လုံခြုံရေးယူပြီး ဆောက်လုပ်နေတာဖြစ်ပါတယ်။
စစ်ကောင်စီက သင်္ကြန်ကိုစည်ကားရေး နည်းမျိုးစုံနဲ့ပြင်ဆင်လျက်ရှိပြီး တော်လှန်ရေးအင်အားစုတွေကလည်း စစ်ကောင်စီ သင်္ကြန်တွင်မပါဖို့ တိုက်တွန်းထားပါတယ်။