အဆိပ်အတောက် ရောနှောနေတဲ့ ချောင်းဆိုးပျောက် ဆေးရည်တွေကြောင့် ကမ္ဘာ့နိုင်ငံ တချို့မှာ ကလေးငယ်တွေ သေဆုံးခဲ့တဲ့ ဖြစ်စဉ်ကို အလေးအနက် သဘောထားပြီး ကြိုတင် ကာကွယ် တားဆီးမှုတွေ လုပ်ဆောင်ကြဖို့ ကမ္ဘာ့ကျန်းမာရေး အဖွဲ့ကြီး (WHO)က သတိပေး တိုက်တွန်းလိုက်ပါတယ်။
WHOက ဒီဖြစ်စဉ်နဲ့ ပတ်သက်လို့ စုံစမ်းစစ်ဆေးမှုတွေ ပြုလုပ်သွားမှာ ဖြစ်သလို အလားတူ အခြေအနေတွေ ပေါ်ပေါက်မလာအောင် နိုင်ငံ အသီးသီးရဲ့ အစိုးရတွေက နိုးနိုးကြားကြား ပြင်ဆင်ထားဖို့လည်း ဆော်ဩခဲ့ပါတယ်။
ပြီးခဲ့တဲ့နှစ်က ကမ္ဘာ့နိုင်ငံ တချို့မှာ အဆိပ်အတောက် ရောနှောနေတဲ့ ချောင်းဆိုးပျောက် ဆေးရည်တွေ သောက်သုံးမိလို့ ကလေး ၃၀၀ ကျော် သေဆုံးခဲ့တယ်လို့ သိရပါတယ်။ အိန္ဒိယနဲ့ အင်ဒိုနီးရှား ဆေးဝါးလုပ်ငန်း ၆ ခုက ထုတ်လုပ်တဲ့ ချောင်းဆိုးနဲ့ အဖျားပျောက် ဆေးရည်တွေမှာ လက်မခံနိုင်လောက်အောင် များပြားတဲ့ အဆိပ်အတောက် ပမာဏတွေ ရောနှော ပါဝင်နေတဲ့ အကြောင်းရင်းကို ဖော်ထုတ် စုံစမ်းနိုင်ဖို့လည်း WHOက ကြိုးစားနေပါတယ်။
အဲဒီ ဆေးဝါး ထုတ်လုပ်မှု လုပ်ငန်းတွေရဲ့ နာမည်ကိုတော့ လက်ရှိ စုံစမ်းစစ်ဆေးနေဆဲ ကာလမှာ WHOက မကြေညာသေးပါဘူး။ နောက်ပြီး သုတေသီတွေက ကလေးတွေမှာ ချောင်းဆိုးပျောက် ဆေးရည်တွေ တိုက်ဖို့ တကယ်တမ်း ဆေးပညာ ရှုထောင့်ကနေ လိုအပ်မှု ရှိမရှိ ဆိုတာကိုပါ သုတေသီတွေက ပြန်လည် ဆန်းစစ်နေပါတယ်။
Public Service Announcement
မနှစ်က အဆိပ်အတောက် ရောပါနေတဲ့ ချောင်းဆိုးပျောက် ဆေးရည်တွေ သောက်သုံးမိလို့ ကျောက်ကပ် ထိခိုက်ပျက်စီးပြီး သေဆုံးခဲ့တဲ့ ကလေးငယ် အများစုဟာ အသက် ၅ နှစ်အောက် အရွယ်တွေ ဖြစ်ပါတယ်။ ဂမ်ဘီယာ၊ အင်ဒိုနီးရှားနဲ့ ဥဇဘက်ကစ္စတန် နိုင်ငံတွေမှာ ဒီပြဿနာနဲ့ ဆက်စပ်လို့ ကလေး ၃၀၀ ကျော် သေဆုံးခဲ့တာလို့ WHOက ဆိုပါတယ်။
ကလေးတွေ သေဆုံးရတဲ့ အဓိက အကြောင်းရင်းကတော့ အဆိပ်အတောက် ဖြစ်စေတဲ့ ဒိုင်အီသိုင်လင်း ဂလိုင်ကောနဲ့ အီသိုင်လင်း ဂလိုင်ကော ဓာတ်ပစ္စည်းတွေ ဆေးရည်ထဲမှာ ပမာဏ တော်တော်များများ ပါဝင်နေတာကြောင့်လို့ ဆိုပါတယ်။
အိန္ဒိယနဲ့ အင်ဒိုနီးရှားက ဆေးဝါး ထုတ်လုပ်မှု လုပ်ငန်း ၆ ခုအပြင် ဖိလစ်ပိုင်၊ အရှေ့တီမော၊ ဆီနီဂေါနဲ့ ကမ္ဘောဒီးယားက ဆေးကုမ္ပဏီ တချို့ ထုတ်လုပ်တဲ့ ချောင်းဆိုးနဲ့ အဖျားပျောက် ဆေးရည်တွေမှာလည်း အလားတူ ဓာတ်ပစ္စည်းတွေ ပါဝင်နေတာမျိုး ရှိနိုင်တယ်လို့ WHOက သတိပေးထားပါတယ်။
WHOရဲ့ သတိပေး ကြေညာချက် အပြီးမှာတော့ နိုင်ငံတကာ ဆေးဝါးထုတ်လုပ်မှု လုပ်ငန်းများ အသင်းကြီးက အဖွဲ့ဝင် နိုင်ငံတွေ အနေနဲ့ ဒီကိစ္စအပေါ် စတင် အရေးယူ တုံ့ပြန် ဆောင်ရွက်ကြဖို့ တိုက်တွန်းထားကြောင်း သိရပါတယ်။
