ဇွန်လ ၉ ရက်က နိုင်ငံတောင်ပိုင်း၊ ဂွမ်ဂျူမြို့မှာရှိတဲ့ ၅ ထပ်တိုက်တစ်လုံး ပြိုကျခဲ့တာ ဖြစ်ပါတယ်။ တိုက်ပြိုချိန်မှာ လူ ၁၇ ဦး လိုက်ပါလာတဲ့ ဘတ်စ်ကားက တိုက်အောက်တည့်တည့် လမ်းပေါ်မှာ ရှိနေခဲ့တာလို့ မျက်မြင်တွေက ပြောပါတယ်။
လက်ရှိ အချိန်ထိ အသေအပျောက် ၉ ဦး စာရင်း အတည်ပြုထားပြီး ၈ ဦး ဒဏ်ရာတွေ ရခဲ့ပါတယ်။ ကယ်ဆယ်ရေး လုပ်ငန်းတွေ ဆက်လက် ဆောင်ရွက်နေပြီး အပျက်အစီးပုံ အောက်မှာ ပိတ်မိနေသူတွေကို ဖြန့်ကျက် ရှာဖွေနေဆဲ ဖြစ်ပါတယ်။
တိုက်ပြိုကျရတဲ့ အကြောင်းရင်းကို တိတိကျကျ မသိရသေးပါဘူး။ အဲဒီတိုက်ဟာ ဆောက်လုပ်ရေး လုပ်ငန်းခွင် သတ်မှတ်နေရာ တစ်ခုဖြစ်ပြီး တိုက်မပြိုခင် ကတည်းက ဆောက်လုပ်ရေး လုပ်သားတွေ ထွက်ခွာထားတယ်လို့ ဆိုပါတယ်။ အနီးတဝိုက်က လမ်းတွေကိုလည်း ယာယီ ပိတ်ထားပေမယ့် ဘတ်စ်ကားက ဘယ်လိုဘယ်ပုံ ရောက်လာသလဲ ဆိုတာ အဖြေရှာနေဆဲပါ။
ဒေသခံတွေကတော့ တိုက်ပြိုကျချိန်မှာ တော်လဲသံကြီးလို ကြားလိုက်ရပြီး ဖုန်မှုန့်တွေ ထောင်းထောင်း ထသွားခဲ့တယ်လို့ ပြောကြားခဲ့ပါတယ်။ လုံခြုံရေး ကင်မရာ မှတ်တမ်းတွေမှာတော့ ဘတ်စ်ကားပေါ်တည့်တည့် တိုက်ပြိုကျသွားတာကို တွေ့နိုင်ပါတယ်။
Public Service Announcement
စစ်ဖြစ်နေတာကြောင့် မဟုတ်ဘဲ ငြိမ်းချမ်းတဲ့ ကာလတွေမှာ အဆောက်အအုံ ပြိုကျမှုကြောင့် လူအများဆုံး သေဆုံးတဲ့ စံချိန်ဆိုးကို တောင်ကိုရီးယားက ပိုင်ဆိုင်ထားပါတယ်။ ၁၉၉၅ ခုနှစ်တုန်းက ဆိုးလ်မြို့မှာရှိတဲ့ ဆမ်ပွန်း စျေးဝယ်စင်တာ ပြိုကျရာက လူပေါင်း ၅၀၀ ကျော် အသက်ဆုံးရှုံးခဲ့ကြောင်း သိရပါတယ်။
