ဇွန်လ ၂၂ ရက်ကစပြီး နယူးဆောက်သ်ဝေးလ်စ်ပြည်နယ်၊ ကျေးလက် ဧရိယာ တစ်ခုမှာ ရှိနေတဲ့ အကျဉ်းထောင်မှာ အရေးပေါ် ပြောင်းရွှေ့မှုတွေ စတင် ဆောင်ရွက်နေရတယ်လို့ ဆိုပါတယ်။ အကျဉ်းထောင်နား လယ်မြေတွေကနေ ကျူးကျော်လာတဲ့ ထောင်သောင်းချီ များပြားတဲ့ ကြွက်တွေဟာ ထောင်ရဲ့ အခြေခံ အဆောက်အအုံတွေနဲ့ တခြားပစ္စည်းတွေကို ကိုက်ဖျက်ပစ်နေတယ်လို့ ဆိုပါတယ်။
အကျဉ်းသားတွေနဲ့ အမှုထမ်းတွေရဲ့ ကျန်းမာရေး၊ လုံခြုံရေးတွေကို ဦးစားပေး စဉ်းစားပြီး ဝယ်လင်တန် အကျဉ်းထောင်မှာ အရေးပေါ် ရွှေ့ပြောင်းဖို့ ညွှန်ကြားထားခဲ့ကြောင်း အကျဉ်းဦးစီးဌာန အရာရှိ ပီတာ ဆီဗာရင်က ပြောကြားခဲ့ပါတယ်။ ကြွက်တွေ ဝင်မွှေနေတဲ့ အကျဉ်းထောင်မှာ အကျဉ်းသား ၄၂၀ လောက်နဲ့ အမှုထမ်း ၂၀၀ လောက် ရှိနေပါတယ်။
ဒီပြဿနာကို အရေးပေါ် ရှင်းလင်းပြီးရင် နောက်တစ်ကြိမ် အလားတူ အခြေအနေတွေ ထပ်မကြုံဖို့ပါ ဘက်ပေါင်းစုံ စဉ်းစား ပြင်ဆင်ထားရမယ်လို့ ပြည်နယ် အကျဉ်းဦးစီးဌာန ကော်မရှင်နာ ကီဗင် ကော်ကိုရန်က ပြောပါတယ်။
ဩစတြေးလျ အရှေ့ပိုင်းက ဒေသတချို့မှာ ကြွက်တွေက ကောက်ပဲသီးနှံတွေကို ဖျက်ဆီးလို့ တောင်သူလယ်သမားတွေ အခက်ကြုံရတာမျိုး အရင်ကတည်းက ရှိနေခဲ့ပြီးသားပါ။ ကြွက်တွေ နှိပ်စက်တဲ့အပြင် ပြီးခဲ့တဲ့ နှစ်ပိုင်းတွေအတွင်း မိုးခေါင်မှုတွေ၊ ရေလွှမ်းမိုးမှုတွေကြောင့်လည်း ဒေသတချို့ရဲ့ စိုက်ပျိုးရေး လုပ်ငန်းတွေကို အကြီးအကျယ် ထိခိုက်စေခဲ့ကြောင်း သိရပါတယ်။
