မြန်မာဖက် မှောင်ခို တင်သွင်းမယ့် Covid-19 ဆေးဝါးတွေ အိန္ဒိယ ရဲတပ်ဖွဲ့ ဖမ်းမိ

မဏိပူရ ပြည်နယ် ရဲတပ်ဖွဲ့က အသက် ၂၂ နှစ်နဲ့ ၃၀ ကြား အိန္ဒိယ နိုင်ငံသား ၃ ဦးကို ဖမ်းဆီးထားကြောင်း အတည်ပြုခဲ့ပြီး အခု သီတင်းပတ်ကုန်မှာ ဒေသခံ တရားရုံး တစ်ခုကို ပို့ဆောင်ပြီး စွဲချက်တင်သွားမယ်လို့ ပြောပါတယ်။ အဲဒီ ၃ ဦးဟာ အိန္ဒိယထုတ် Covid-19 ကာကွယ်ဆေး Covishieldနဲ့ ရောဂါ ကုသရာမှာ သုံးစွဲလေ့ရှိတဲ့ Remdesivirဆေး အပါအဝင် ဆေးဝါး အမျိုးအစား တချို့ကို ကားပေါ်တင်ပြီး မြန်မာဖက် ပို့ဆောင်ဖို့ ကြိုးစားခဲ့တယ်လို့ ဆိုပါတယ်။

မဏိပူရာ ရဲတပ်ဖွဲ့က မိုဟာမက် ဖာရိုဇ်ခန်း၊ အင်မ်ရန်ခန်းနဲ့ ရှူဘ်ဟမ် ကူမာတို့ကို ပြီးခဲ့တဲ့ သီတင်းပတ်ကုန်က ဖမ်းဆီး ရမိခဲ့တာပါ။ ရဲတွေက အဝေးပြေး လမ်းမပေါ်မှာ ရှောင်တခင် စစ်ဆေးမှုတွေ ပြုလုပ်ခဲ့တဲ့နောက် ဆေးဝါးတွေ မှောင်ခို ပို့ဆောင်မယ့် မော်တော်ကားကို ဖမ်းမိသွားတာလို့ NDTV သတင်းဌာနက ဖော်ပြပါတယ်။

အဖမ်းခံရသူတွေက သူတို့ဟာ ဆေးတွေကို နယ်စပ်ကနေတဆင့် မြန်မာဖက် မှောင်ခို တင်သွင်းဖို့ စီစဉ်ထားကြောင်း ဝန်ခံခဲ့ပါတယ်။ ရဲတွေက အမှုကို ဆက်လက် စစ်ဆေးနေပြီး နောက်ထပ် ပူးပေါင်း ပါဝင်သူတွေ ရှိမရှိနဲ့ ဆေးတွေကို ဘယ်နေရာကနေ ရလာသလဲ ဆိုတာတွေကို စုံစမ်းနေကြောင်း သိရပါတယ်။