ကိုယ်တိုင်က ကိုဗစ်ရောဂါ ဖြစ်ပွားနေပေမယ့် ချက်နိုင်ငံ သမ္မတဟာ ဝန်ကြီးချုပ်သစ် ခန့်အပ်ပွဲကို မှန်လုံအိမ်ထဲကနေတဆင့် တက်ရောက်ခဲ့ပါတယ်။
သမ္မတ မီလော့စ် ဇီမန်းဟာ ကိုဗစ်ရောဂါ စွဲကပ်နေကြောင်း ဆေးစစ် အတည်ပြု တွေ့ရှိထားပါတယ်။ ဒါပေမဲ့ သူဟာ ဗဟို လက်ယာယိမ်း နိုင်ငံရေး မဟာမိတ် ခေါင်းဆောင် ပီတာ ဖီယာလာကို ဝန်ကြီးချုပ်သစ် ရာထူးမှာ ခန့်အပ်မယ့် အခမ်းအနားကို တက်ရောက်ဖို့ အပျက်ကွက် မခံခဲ့ပါဘူး။
ဖီယာလာဟာ ဗဟို လက်ယာယိမ်း အတိုက်အခံ ငါးပါတီ ဖွဲ့စည်းထားတဲ့ နိုင်ငံရေး မဟာမိတ် အင်အားစုကို ဦးဆောင်ပြီး အောက်တိုဘာ ရွေးကောက်ပွဲမှာ အနိုင်ရခဲ့ပါတယ်။ နိုဝင်ဘာ ၂၈ ရက်က ဖီယာလာ ဦးဆောင်တဲ့ အစိုးရသစ်ဟာ တရားဝင် ရာထူး လက်ခံခဲ့ပြီး သမ္မတ ဇီမန်းက ဒီအခမ်းအနားကို ကြီးမှူးခဲ့တာပါ။
ဇီမန်းဟာ ကိုဗစ်ရောဂါ ခံစားနေရပေမယ့်လည်း လေးထောင့် မှန်လုံအိမ် တစ်လုံးထဲမှာ ဘီးတပ် ကုလားထိုင်ပေါ် ထိုင်ပြီး လုပ်ထုံးလုပ်နည်းတွေနဲ့အညီ ပါဝင် ဆောင်ရွက်ပေးသွားခဲ့ပါတယ်။
Public Service Announcement
ဖီယာလာ ဦးဆောင်တဲ့ အစိုးရသစ်ဟာ ပြည်တွင်းမှာ ကပ်ရောဂါ ကူးစက်နှုန်း မြင့်တက်လာပြီး ဆေးရုံ ဆေးခန်းတွေ မလောက်မငှ ဖြစ်လာတာ၊ စွမ်းအင် လိုအပ်ချက်တွေ မြင့်မားလာတာ အစရှိတဲ့ စိန်ခေါ်မှုတွေကို ရင်ဆိုင် ဖြေရှင်းရမှာပါ။
အစိုးရသစ် အတွက်တော့ ရှုပ်ထွေးလွန်းပြီး စိန်ခေါ်မှုတွေ အများကြီးကို ကိုင်တွယ်ရမယ့် ကာလမျိုး ရောက်နေကြောင်း၊ သူ့အနေနဲ့ ချက်နိုင်ငံမှာ အနာဂတ်ကို ပြောင်းလဲပေးမယ့် အစိုးရ အဖွဲ့မျိုး ဖြစ်လာဖို့ မျှော်လင့်ကြောင်း သတင်းစာ ရှင်းလင်းပွဲမှာ ဖီယာလာက ပြောကြားသွားပါတယ်။
အခမ်းအနားကို သမ္မတ ဇီမန်း တက်ရောက်လာချိန်မှာ အကာအကွယ် ဝတ်စုံပြည့် ဝတ်ဆင်ထားတဲ့ ဆေးဝန်ထမ်းတွေက သူ့ကို အကူအညီ ပေးခဲ့ကြပါတယ်။ ဇီမန်းဟာ သီးခြား ဖျားနာမှု တစ်ခုကြောင့် ဆေးရုံမှာ သီတင်း ခြောက်ပတ်လောက် တက်ရောက်နေရင်း ကိုဗစ်ရောဂါပါ ကူးစက် ခံခဲ့ရတာ ဖြစ်ပါတယ်။
