ဟေတီနိုင်ငံနဲ့ နယ်နိမိတ်ကို ပိုင်းခြားထားမယ့် တံတိုင်းတစ်ခု စတင် တည်ဆောက်နေပြီလို့ ဒိုမီနီကန် နိုင်ငံ အစိုးရက ကြေညာခဲ့ပါတယ်။
အဲဒီ တံတိုင်းဟာ နှစ်နိုင်ငံကြား ၂၄၄ မိုင် ရှည်လျားတဲ့ နယ်နိမိတ် မျဉ်းရဲ့ ထက်ဝက်လောက် အကွာအဝေးကို လွှမ်းခြုံထားနိုင်မယ်လို့ သိရပါတယ်။ ဟေတီနဲ့ ဒိုမီနီကန် နှစ်နိုင်ငံဟာ ဟစ္စပန်နီယိုလာ ကျွန်းပေါ်မှာ တည်ရှိပြီး အချင်းချင်းကလွဲလို့ တခြား အိမ်နီးချင်း နိုင်ငံတွေလည်း မရှိပါဘူး။
နှစ်နိုင်ငံ ကပ်လျက် ရှိနေပေမယ့်လည်း ဖွံ့ဖြိုးတိုးတက်မှုချင်းကတော့ အရမ်း ကွာခြားပါတယ်။ ဒိုမီနီကန်ဟာ တည်ငြိမ်တဲ့ နိုင်ငံရေး တိုးတက်မှုတွေနဲ့အတူ ကာရေဘီယန် ဒေသမှာ ကမ္ဘာလှည့် ခရီးသည်တွေကို အဆွဲဆောင်နိုင်ဆုံး နိုင်ငံတစ်ခု ဖြစ်လာပါတယ်။
ဟေတီကတော့ နိုင်ငံရေး ပြဿနာတွေ၊ သဘာဝ ဘေးအန္တရာယ်တွေကြောင့် ချွတ်ခြုံကျနေပြီး အနောက်ကမ္ဘာခြမ်းမှာ အဆင်းရဲဆုံး နိုင်ငံအဖြစ် သတ်မှတ် ခံထားရပါတယ်။ ဟေတီနိုင်ငံသား အမြောက်အမြားဟာ နယ်စပ်ကို တရားမဝင် ဖြတ်ကျော်ပြီး ဒိုမီနီကန် ပိုင်နက်ဖက် ခိုးဝင်လေ့ ရှိသလို မူးယစ်ဆေးဝါး မှောင်ခိုဂိုဏ်းတွေကလည်း ဟေတီကနေတဆင့် ဒိုမီနီကန်ကို ဝင်ရောက်တတ်ကြပါတယ်။
Public Service Announcement
အခု တံတိုင်းသစ် တည်ဆောက်မှုဟာ နှစ်နိုင်ငံလုံးအတွက် ကောင်းကျိုး ဖြစ်ထွန်းနိုင်ဖို့ အရမ်းအရေးကြီးတယ်လို့ ဒိုမီနီနကန် သမ္မတ လူးဝစ် အဘီနန်ဒါက တံတိုင်းသစ် အုတ်မြစ်ချ အခမ်းအနားမှာ ပြောကြားခဲ့ပါတယ်။
တံတိုင်းရဲ့ ပထမအဆင့် ဆောက်လုပ်မှုတွေဟာ ၉ လအတွင်း အပြီးသတ်နိုင်မယ်လို့ အဘီနန်ဒါက ဆိုပါတယ်။ အဲဒီ တံတိုင်းဟာ ၁၃ ပေ နီးပါး အမြင့်ရှိပြီး ၈ လက်မလောက် ထူမှာပါ။ တံတိုင်း တလျှောက်မှာ အင်တာနက် ကွန်ရက် ဖြန့်ကျက်ထားပြီး ဆက်သွယ်ရေး စနစ်တွေ၊ လှုပ်ရှားမှု အာရုံခံ ကိရိယာတွေ၊ ကင်မရာတွေ၊ ရေဒါတွေနဲ့ ဒရုန်းတွေ တပ်ဆင်ထားမယ်လို့လည်း သိရပါတယ်။
