သင်တန်းပေးဖို့ ဗြိတိန် လေတပ် လေယာဉ်မှူးဟောင်း တချို့ကိုတရုတ် ကမ်းလှမ်းတာတွေရှိနေ

ဗြိတိန် လေတပ် လေယာဉ်မှူးဟောင်းတွေကို အတွေ့အကြုံတွေ မျှဝေပေးဖို့ ငွေကြေးအလုံးအရင်းပေးပြီး တရုတ်က ချဉ်းကပ် ကမ်းလှမ်းနေကြောင်း သိရပါတယ်။

ဗြိတိန် ကာကွယ်ရေး ဝန်ကြီးဌာနက လေတပ်ရဲ့ လေယာဉ်မှူးဟောင်း ၃၀ လောက်ဟာ တရုတ် ပြည်သူ့ လွတ်မြောက်ရေးတပ် (PLA)ရဲ့ လေယာဉ်မှူးတွေကို လေ့ကျင့် သင်ကြားပေးဖို့ ကမ်းလှမ်း ခံခဲ့ရကြောင်း ပြောပါတယ်။ သူတို့ရဲ့ ကျွမ်းကျင်မှုနဲ့ အတွေ့အကြုံတွေကို မျှဝေပေးရင် ငွေကြေး တနင့်တပိုး ရရှိစေမယ်လို့ တရုတ်ဖက်က ကမ်းလှမ်းခဲ့တယ်လို့ ဆိုပါတယ်။

ဗြိတိန် ထောက်လှမ်းရေးဟာ ဒီအခြေအနေနဲ့ ပတ်သက်လို့ စုံစမ်းစစ်ဆေးမှုတွေ ပြုလုပ်နေပြီး စစ်ဘက် လေယာဉ်မှူးဟောင်းတွေကိုလည်း တရုတ်အတွက် အလုပ်မလုပ်ပေးဖို့ ဆက်သွယ် သတိပေးထားပါတယ်။

ဗြိတိန်မှာတင် မကဘဲ တခြား အနောက်ဥရောပ နိုင်ငံတချို့ရဲ့ လေယာဉ်မှူးတွေကိုလည်း လေ့ကျင့် သင်တန်းပေးရေး ကိစ္စအတွက် သွေးဆောင် ချဉ်းကပ်တာမျိုးတွေက မကြာသေးခင် လပိုင်းတွေအတွင်း ပိုမို ထူပြောလာတယ်လို့ သိရပါတယ်။

Public Service Announcement

တကယ်လို့ ဗြိတိန် စစ်လေယာဉ်မှူးဟောင်းတွေက တရုတ်ကို သွားရောက်ပြီး PLAရဲ့ လေယာဉ်မှူးတွေကို လေ့ကျင့်ပေးမယ်ဆိုရင် နိုင်ငံရဲ့ ဥပဒေတွေကို ချိုးဖောက်ရာ မရောက်ပါဘူး။ ဒါပေမဲ့လည်း ဒီဖြစ်စဉ်မျိုးကို တားဆီးဖို့ ဗြိတိန်ရော၊ တခြား ဥရောပ နိုင်ငံတွေကပါ နည်းလမ်း ရှာနေရပါတယ်။

ငွေကြေးဆိုတာက အဆွဲဆောင်နိုင်ဆုံး မက်လုံးတစ်ခုဖြစ်ကြောင်း၊ လေ့ကျင့်ပျံသန်းရေး အစီအစဉ် တစ်ခုအတွက် တချို့ ကမ်းလှမ်းမှုတွေဟာ ဒေါ်လာ ၂ သိန်း ၇ သောင်းလောက်ထိ များပြားတတ်ကြောင်း အနောက်နိုင်ငံ တစ်ခုရဲ့ ထောက်လှမ်းရေး အရာရှိ တစ်ယောက်က ပြောပါတယ်။

တရုတ်ဟာ ပြီးခဲ့တဲ့ နှစ်ပိုင်းတွေအတွင်း စစ်အင်အားနဲ့ စစ်ဘက် နည်းပညာတွေကို တိုးမြှင့် ချဲ့ထွင်လာပေမယ့် လေ့ကျင့်မှုနဲ့ အတွေ့အကြုံပိုင်းတွေမှာ ကြီးမားတဲ့ အားနည်းချက်တွေ ရှိနေဆဲပါ။ လောလောဆယ် တရုတ်ဖက်က ချိတ်ဆက်မှုကို ခံရတဲ့ ဗြိတိန် တိုက်လေယာဉ်မှူးဟောင်း၊ စစ်လေယာဉ်မှူးဟောင်းတွေဟာ အသက် ၅၀ ကျော် အရွယ်တွေ ဖြစ်တယ်လို့ ဆိုပါတယ်။ PLAကတော့ အခုသတင်းတွေနဲ့ ပတ်သက်ပြီး ဘာမှတ်ချက်မှ မပေးဘဲ နှုတ်ဆိတ်နေဆဲ ဖြစ်ပါတယ်။