မြောက်ကိုရီးယား အနေနဲ့ နောက်ထပ် နျူကလီးယားလက်နက် စမ်းသပ်မှု ပြုလုပ်မယ့် အလားအလာ မရှိသေးပေမယ့် နိုးနိုးကြားကြား စောင့်ကြည့်ဖို့တော့ လိုတယ်လို့ အမေရိကန် စစ်ထောက်လှမ်းရေးက ပြောပါတယ်။
အမေရိကန် ကာကွယ်ရေး ထောက်လှမ်းမှု အေဂျင်စီ (DIA)က မြောက်ကိုရီးယား ခေါင်းဆောင် ကင်မ်ဂျုံအန်းဟာ လတ်တလောမှာ ဒုံးကျည် စမ်းသပ်မှုတွေ အရှိန်မြှင့် လုပ်ဆောင်နေစေတဲ့တိုင် နျူကလီးယားလက်နက် စမ်းသပ်မှု ထပ်မံပြုလုပ်မယ့် အခြေအနေတော့ မရှိဘူးလို့ မှတ်ချက် ပေးထားပါတယ်။
အစောပိုင်းတုန်းက အမေရိကန်နဲ့ တောင်ကိုရီးယားတို့က မြောက်ကိုရီးယားဟာ ၂၀၁၇ နောက်ပိုင်း ပထမဆုံးအကြိမ် နျူကလီးယားလက်နက် စမ်းသပ်မှုတစ်ခု လုပ်ဆောင်လာနိုင်ခြေ မြင့်မြင့်မားမား ရှိနေကြောင်း သုံးသပ်ထားကြပါတယ်။
ပြီးခဲ့တဲ့နှစ်၊ မေလတုန်းက အမေရိကန် သမ္မတ ဂျိုးဘိုင်ဒန်ရဲ့ အာရှ ခရီးစဉ် မတိုင်ခင်မှာ ကတည်းက မြောက်ကိုရီးယားရဲ့ နျူကလီးယား စမ်းသပ်မှု ပေါ်ပေါက်လာနိုင်ကြောင်း အမေရိကန် အမျိုးသား လုံခြုံရေး အကြံပေး အရာရှိ ဂျက် ဆူလီဗန်က သတိပေးခဲ့ဖူးပါတယ်။
Public Service Announcement
ဒါပေမဲ့လည်း လက်ရှိ အခြေအနေတွေ အရတော့ မြောက်ကိုရီးယားဟာ နျူကလီးယား စမ်းသပ်ဖောက်ခွဲနိုင်ခြေ အတော်လေး နည်းသွားပြီဖြစ်ကြောင်း၊ ကင်မ်ရဲ့ နောက်ထပ် ခြေလှမ်းနဲ့ ပတ်သက်လို့ ရှုထောင့်ပေါင်းစုံက တွက်ချက်ကြည့်တဲ့နောက် ဒုံးကျည် စမ်းသပ်မှုတွေအပေါ် ပိုမို အာရုံရောက်နေဟန်ရှိပြီး နျူကလီးယား လက်နက် နည်းပညာနဲ့ အဆက်အစပ် သိပ်မရှိတော့ကြောင်း DIAရဲ့ အကြီးအကဲ ဒုတိယ ဗိုလ်ချုပ်ကြီး စကော့ ဘာရီရာက သတင်းထောက်တွေကို ပြောပါတယ်။
လတ်တလောမှာတော့ ကင်မ်ဟာ နျူကလီးယားလက်နက် စမ်းသပ်ဖို့ မြောက်ကိုရီးယား စစ်တပ်ကို ညွှန်ကြားထားဟန် မရှိကြောင်း၊ ဒါပေမဲ့ လုံးဝ မပေါ့ဆဘဲ နိုးနိုးကြားကြားနဲ့ သတိထား စောင့်ကြည့်ဖို့တော့ လိုနေဆဲဖြစ်ကြောင်း ဘာရီရာက ဆိုပါတယ်။
မြောက်ကိုရီးယားဟာ ၂၀၀၆ ခုနှစ်ကစလို့ နျူကလီးယား လက်နက် စမ်းသပ်ဖောက်ခွဲမှု ၆ ကြိမ် ပြုလုပ်ခဲ့ပြီး အဲဒီထဲက ၄ ကြိမ်ဟာ ကင်မ်ရဲ့ လက်ထက်မှာ အကောင်အထည် ဖော်ခဲ့တာ ဖြစ်ပါတယ်။
