မြောက်ကိုရီးယားရဲ့ ဒုံးကျည် ခြိမ်းခြောက်မှုတွေကို တုံ့ပြန်တဲ့ အနေနဲ့ အမေရိကန်၊ ဂျပန်နဲ့ တောင်ကိုရီးယား ရေတပ်တွေ ပူးပေါင်းပြီး ဒုံးကျည် ကြားဖြတ် ဟန့်တားရေး စစ်ရေးလေ့ကျင့်မှု တစ်ခုကို ပြုလုပ်ခဲ့ပါတယ်။
အခုသီတင်းပတ်မှာ စတင်တဲ့ စစ်ရေးလေ့ကျင့်မှုမှာ မဟာမိတ် ၃ နိုင်ငံရဲ့ ဖျက်သင်္ဘောတွေဟာ ဂျပန်နဲ့ တောင်ကိုရီးယားကြား ရေပြင်မှာ ခုတ်မောင်းရင်း မြောက်ကိုရီးယားက ဒုံးကျည် ပစ်လွှတ်မှုကို ကြားဖြတ် ဟန့်တားတဲ့ ပုံစံမျိုး သရုပ်တူ လေ့ကျင့်မှုတွေ လုပ်ဆောင်နေတာ ဖြစ်ပါတယ်။
အဲဒီသုံးနိုင်ငံဟာ ဂျပန်ပင်လယ်နဲ့ ကိုရီးယား ကျွန်းဆွယ်တဝိုက် ရေပြင်မှာ ရေငုပ်သင်္ဘောဖျက် စစ်ရေးလေ့ကျင့်မှုတွေ ပုံမှန် အကောင်အထည် ဖော်ဖို့လည်း မူအားဖြင့် သဘောတူခဲ့ကြပါတယ်။
မြောက်ကိုရီးယားက လောင်စာတောင့် နည်းပညာသစ် အသုံးပြုထားတဲ့ တိုက်ချင်းပစ် ဒုံးကျည်တစ်စင်းကို အောင်အောင်မြင်မြင် စမ်းသပ် ပစ်ခတ်ခဲ့ကြောင်း ကြေညာပြီး တစ်ပတ်လောက် အကြာမှာ မဟာမိတ် သုံးနိုင်ငံရဲ့ ဒုံးကျည်ကာကွယ်ရေး စုပေါင်း လေ့ကျင့်မှုကို အကောင်အထည် ဖော်ခဲ့တာပါ။
Public Service Announcement
လောင်စာတောင့် နည်းပညာဟာ လောင်စာအရည် အသုံးပြုတဲ့ ဒုံးကျည်တွေထက် မဟာဗျူဟာ အားသာချက်တွေ တော်တော်များများ ပိုင်ဆိုင်ထားတာကြောင့် မြောက်ကိုရီးယားဟာ သိသာထင်ရှားတဲ့ နည်းပညာပိုင်း ခြေလှမ်းသစ် တစ်ခုကို စတင်လိုက်တာလို့ ယူဆနိုင်ပါတယ်။
သုံးနိုင်ငံ ပူးပေါင်း စစ်ရေးလေ့ကျင့်မှုမှာ တောင်ကိုရီးယားရဲ့ Yulgok Yi I ဖျက်သင်္ဘော၊ အမေရိကန်ရဲ့ ပဲ့ထိန်းဒုံးကျည်တပ် Benfold ဖျက်သင်္ဘောနဲ့ ဂျပန်ရဲ့ Atago ဖျက်သင်္ဘောတွေ ချိတ်ဆက် လှုပ်ရှားခဲ့ကြပါတယ်။ မြောက်ကိုရီးယားကတော့ ဒီလို စစ်ရေးလေ့ကျင့်မှုတွေဟာ ကျူးကျော်စစ်ပွဲကို စတင်ဖို့ လက်တွေ့ ပြင်ဆင်နေတာလို့ စွပ်စွဲပြီး ဒေသတွင်း တင်းမာမှုတွေကို ပိုမို ဆိုးရွားလာစေလိမ့်မယ်လို့ တင်းတင်းမာမာ သတိပေးထားပါတယ်။
အမေရိကန်၊ ဂျပန်နဲ့ တောင်ကိုရီးယားတို့ဟာ သီးခြား အစီအမံ တစ်ခုအနေနဲ့ ၁၂ ရက်ကြာ လေတပ် ပူးပေါင်း စစ်ရေးလေ့ကျင့်မှု တစ်ခုကိုလည်း အခုသီတင်းပတ်မှာ စတင်ခဲ့ကြောင်း သိရပါတယ်။
