ဟားမားစ်တွေနဲ့ စစ်ခင်းနေတဲ့ အခြေအနေမှာ ဟက်ဇ်ဘိုလာတွေနဲ့ပါ စစ်တိုက်ရဖို့ မလိုလားကြောင်း အစ္စရေးဖက်က အတည်ပြုခဲ့ပါတယ်။
အစ္စရေးဟာ နိုင်ငံ အနောက်တောင်ပိုင်းမှာ နယ်နိမိတ် ထိစပ်နေတဲ့ ဂါဇာ ကမ်းမြှောင်ဒေသ အခြေစိုက် ပါလက်စတိုင်း ပြောက်ကျားအဖွဲ့ ဟားမားစ်နဲ့ အကြီးအကျယ် စစ်ဖြစ်နေပြီး မြောက်ပိုင်းက လက်ဘနွန် နယ်စပ်မှာလည်း ဟက်ဇ်ဘိုလာတွေနဲ့ စစ်ရေး တင်းမာနေပါတယ်။
လက်ဘနွန် အခြေစိုက် ပြောက်ကျားတွေနဲ့ အစ္စရေး နယ်စပ် လုံခြုံရေး တပ်ဖွဲ့တွေကြား ပြီးခဲ့တဲ့ သီတင်းပတ်မှာ အပြန်အလှန် နယ်စပ်ဖြတ်ကျော် ပစ်ခတ်မှုတွေ ဖြစ်ပွားခဲ့သလို အသေအပျောက်တွေလည်း ရှိခဲ့ပါတယ်။
ဟားမားစ်ရော၊ ဟက်ဇ်ဘိုလာပါ အီရန် အစိုးရရဲ့ ကျောထောက်နောက်ခံ ပံ့ပိုးမှုကို ရရှိထားတဲ့ လက်နက်ကိုင် အင်အားစုတွေဖြစ်ပြီး အရင်ကလည်း အစ္စရေးနဲ့ စစ်ပွဲတွေ ဖြစ်ခဲ့ဖူးပါတယ်။
စစ်ပွဲကာလ အရေးပေါ် ဖွဲ့စည်းထားတဲ့ အစ္စရေး အစိုးရရဲ့ ကာကွယ်ရေး ဝန်ကြီး ယိုအက်ဗ် ဂဲလန့်ကတော့ မြောက်ပိုင်း (လက်ဘနွန်နဲ့ နယ်စပ်)မှာ စစ်တိုက်ဖို့ အစ္စရေး အနေနဲ့ စိတ်မဝင်စားကြောင်း၊ အခြေအနေတွေ ပိုဆိုးလာအောင်လည်း အစ္စရေးက မီးစာ မဖြည့်ချင်ကြောင်း သတင်းထောက်တွေကို ပြောပါတယ်။
Public Service Announcement
ဒါပေမဲ့ ဟက်ဇ်ဘိုလာတွေက စစ်ပွဲကို ရွေးချယ်ဖို့ ဆုံးဖြတ်ထားရင်လည်း အစ္စရေးက ငြင်းနေမှာ မဟုတ်ကြောင်း၊ ဟက်ဇ်ဘိုလာတွေလည်း ကြီးကြီးမားမား၊ အရမ်းကို ကြီးကြီးမားမား ပေးဆပ်ရမယ်ဆိုတာ နားလည်သင့်ကြောင်း၊ ဒါပေမဲ့ ထိန်းထိန်းသိမ်းသိမ်း လုပ်ဆောင်မယ် ဆိုရင်တော့ အစ္စရေးကလည်း ဒီအခြေအနေကို လေးစားပြီး တူညီတဲ့ တုံ့ပြန်မှုမျိုး ပြသလိုကြောင်း ဂဲလန့်က ဆိုပါတယ်။
လောလောဆယ်တော့ အစ္စရေးဟာ လက်ဘနွန် နယ်စပ်တဝိုက်မှာ စစ်ဆင်ရေးနယ်မြေအဖြစ် သတ်မှတ် ကြေညာထားလိုက်ပြီး အရပ်သားတွေ နယ်စပ်နား ချဉ်းကပ်မှုကိုပါ ပိတ်ပင်ထားလိုက်ပါတယ်။ ပြီးခဲ့တဲ့ ရက်ပိုင်းတွေအတွင်း နှစ်ဖက် တပ်တွေက နယ်စပ်ဖြတ်ကျော် အပြန်အလှန် ပစ်ခတ်တာတွေ ရှိခဲ့တယ် ဆိုတာကို အစ္စရေးကရော၊ ဟက်ဇ်ဘိုလာတွေကပါ အသီးသီး အတည်ပြုထားကြပါတယ်။
