ဓါးစာခံတွေ အားလုံး မလွတ်မချင်း အပစ်အခတ် ရပ်စဲဖို့ မဖြစ်နိုင်ဘူးလို့ အစ္စရေး ဝန်ကြီးချုပ်ပြော

နိုင်ငံတကာ အသိုက်အဝန်းက ဂါဇာကမ်းမြှောင်ဒေသမှာ အစ္စရေးနဲ့ ဟားမားစ် ပြောက်ကျားအဖွဲ့တို့ကြား စစ်ခင်း တိုက်ခိုက်နေမှု ရပ်ဆိုင်းဖို့ ဖိအားပေး တောင်းဆိုမှုတွေ မြင့်တက်လာချိန်မှာ နေတန်ညာဟုက အခုလို တုံ့ပြန်ခဲ့တာ ဖြစ်ပါတယ်။ အောက်တိုဘာ ၇ ရက်မှာ ဟားမားစ်တွေက အစ္စရေးကို နယ်စပ်ဖြတ်ကျော်ပြီး အလစ်အငိုက် စီးနင်း တိုက်ခိုက်မှုကြောင့် လူပေါင်း ၁၄၀၀ ကျော် သေဆုံးပြီး ၂၄၀ ကျော်လောက်ကိုလည်း ဟားမားစ်တွေက ဓားစာခံအဖြစ် ဖမ်းဆီးပြီး ဂါဇာဖက်ကို ခေါ်ဆောင်သွားခဲ့ပါတယ်။

အစ္စရေးဟာ အဲဒီ ကိစ္စကို လက်တုံ့ပြန်ပြီး ဂါဇာမှာ စစ်ဆင်ရေးတွေ အသည်းအမည်း ဆင်နွှဲခဲ့တာကြောင့် အရပ်သား အများစု အပါအဝင် ပါလက်စတိုင်း တစ်သောင်းနီးပါးထိ သေဆုံးခဲ့ပါတယ်။ အစ္စရေးရဲ့ စစ်ဆင်ရေးတွေ ပြင်းထန်လွန်းပြီး အရပ်သားတွေ ထိခိုက် သေကြေမှု များပြားနေတာကြောင့် နိုင်ငံတကာက ကန့်ကွက် ဝေဖန်မှုတွေ မြင့်တက်လာပြီး စစ်ပွဲရပ်ဆိုင်းဖို့ တောင်းဆိုသံတွေ ကျယ်လောင်လာတာပါ။

နေတန်ညာဟုကတော့ အဖမ်းခံထားရတဲ့ ဓားစာခံတွေ အားလုံး မလွတ်မြောက်မချင်း အပစ်အခတ် ရပ်စဲရေး ကိစ္စဆိုတာ စကားတောင် မဟသင့်ဘူးလို့ တုံ့ပြန်ခဲ့ပါတယ်။ နေတန်ညာဟုဟာ အစ္စရေး တောင်ပိုင်းမှာရှိတဲ့ ရာမွန် လေတပ်စခန်းမှာ လေတပ်သားတွေကို သွားရောက် တွေ့ဆုံချိန်မှာ အစ္စရေး အစိုးရ အနေနဲ့ ဟားမားစ်တွေကို ပြတ်ပြတ်သားသား ချေမှုန်းဖို့ သံန္နိဋ္ဌာန် ချထားပြီး ဖြစ်ကြောင်းလည်း ပြောပါတယ်။

အစ္စရေးက ဘယ်ဟာရန်သူ၊ ဘယ်ဟာ မိတ်ဆွေ ဆိုတာကို ခွဲခွဲခြားခြား သိနားလည်ကြောင်း၊ ရန်သူကို အပြတ်ချေမှုန်းဖို့ ရှေ့ဆက် လုပ်ဆောင်နေမှာဖြစ်ပြီး အစ္စရေးရဲ့ အဲဒီ မူဝါဒက ပြောင်းလဲသွားမှာလည်း မဟုတ်ကြောင်း ဝန်ကြီးချုပ်က ဆိုပါတယ်။

လောလောဆယ်တော့ အစ္စရေးဟာ ကြည်းတပ်၊ ရေတပ်၊ လေတပ်တွေ အားလုံးကို စုပေါင်း အသုံးပြုပြီး ဂါဇာစီးတီး အပါအဝင် ဂါဇာမြောက်ပိုင်း ဒေသတွေကို အပြင်းအထန် ထိုးစစ်ဆင် တိုက်ခိုက်နေပါတယ်။

Public Service Announcement

အစ္စရေးက ဟားမားစ်တွေ လက်ထဲမှာ ရှိနေတဲ့ ဓားစာခံတွေ ပြန်လည် လွတ်မြောက်ရေးအတွက် တောင်းဆိုနေချိန် ဟားမားစ်တွေကလည်း အစ္စရေး ဖမ်းဆီးထားသမျှ ပါလက်စတိုင်း အားလုံးကို ပြန်လွှတ်မှသာ ဓားစာခံတွေကို လွှတ်ပေးမယ်လို့ တုံ့ပြန်ထားပါတယ်။