စစ်အုပ်ချုပ်ရေးအမိန့် ကြေညာခဲ့တဲ့ ကိစ္စ မအောင်မြင်ခဲ့တဲ့နောက် အဲဒီ အမိန့်ကို ကြီးမှူး အကောင်အထည် ဖော်ခဲ့သူ တောင်ကိုရီးယား ကာကွယ်ရေး ဝန်ကြီးဟောင်းဟာ ကိုယ့်ကိုယ်ကိုယ် သတ်သေဖို့ ကြိုးစားခဲ့ကြောင်း သိရပါတယ်။
ကင်မ်ယွန်ဟွန်ဟာ ဒီဇင်ဘာ ၃ ရက်နေ့ ညပိုင်းတုန်းက သမ္မတ ယွန်ဆွတ်ခ်ယော ရုတ်တရက် ထုတ်ပြန် ကြေညာခဲ့တဲ့ စစ်အုပ်ချုပ်ရေး အမိန့်ကို အဓိက ဦးစီး အကောင်အထည် ဖော်သူအဖြစ် စွပ်စွဲခံထားရပါတယ်။ သူဟာ အဲဒီကိစ္စနဲ့ ပတ်သက်လို့ ရာထူးကနေ တာဝန်ယူ နုတ်ထွက်ခဲ့ရပြီး အဖမ်းလည်း ခံထားရပါတယ်။
၆ နာရီသာ သက်တမ်းခံခဲ့တဲ့ စစ်အုပ်ချုပ်ရေး အမိန့်ဟာ နိုင်ငံကို ထိခိုက်စေခဲ့ကြောင်း စွပ်စွဲချက်တွေကို အကြောင်းပြုပြီး ကင်မ်ဟာ ရာဇဝတ်ကြောင်းဆိုင်ရာ စုံစမ်း စစ်ဆေးမှုတွေ ခံယူနေရပါတယ်။ သူ့အတွက် ဖမ်းဝရမ်းကို ဆိုးလ်မြို့တော် တရားရုံး တစ်ခုက အတည်ပြုပေးခဲ့တဲ့နောက် ရဲတွေက ကင်မ်ကို ဒီဇင်ဘာ ၁၁ ရက်နေ့ မနက်အစောပိုင်းမှာ ဖမ်းဆီးခဲ့ပါတယ်။ သူဟာ စစ်အုပ်ချုပ်ရေး ကြေညာခဲ့တဲ့ ကိစ္စနဲ့ ဆက်စပ်ပြီး ပထမဆုံး ဖမ်းဆီးခံရသူလည်း ဖြစ်လာခဲ့ပါတယ်။
ကင်မ်ဟာ ဖမ်းဝရမ်း ထွက်လာပြီး တရားဝင် ဖမ်းဆီးတာကို မခံရခင် အတောအတွင်း ကိုယ့်ကိုယ်ကိုယ် အဆုံးစီရင်ဖို့ ကြိုးစားခဲ့ကြောင်း ကိုရီးယား အကျဉ်းဦးစီးဌာနရဲ့ ကော်မရှင် အကြီးအကဲ ရှင်ယောင်ဟေးက ပြောပါတယ်။
Public Service Announcement
လွှတ်တော်က ကြားနာမှု တစ်ခုမှာ အစီရင်ခံရာမှာတော့ ရှင်က ဝန်ကြီးဟောင်းဟာ သူ့ကို သွားရောက် ဖမ်းဆီးတဲ့အချိန် ရေချိုးခန်းထဲမှာ သေကြောင်းကြံဖို့ အားထုတ်နေခဲ့ပြီး အရာရှိ တစ်ဦးက တံခါးကို ဆွဲဖွင့်လိုက်တဲ့ နောက်ပိုင်းကျမှ အဲဒီကိစ္စကို ကင်မ်က လက်လျှော့လိုက်တာလို့ ပြောကြားသွားပါတယ်။ အသေးစိတ် အကြောင်းအရာတွေကိုတော့ သူက တင်ပြခဲ့ခြင်း မရှိပါဘူး။
လောလောဆယ်မှာတော့ ကင်မ်ကို သီးသန့်ခန်း တစ်ခုထဲမှာ ထားရှိကြောင်း၊ ကာကွယ်ရေး ဝန်ကြီးဟောင်းမှာ ကျန်းမာရေး ပြဿနာ တစ်စုံတရာ မရှိကြောင်း ရှင်က ဆိုပါတယ်။
စစ်အုပ်ချုပ်ရေး ကြေညာအမိန့်ရဲ့ နောက်ဆက်တွဲ ပြဿနာတွေက တောင်ကိုရီးယားမှာ အကြီးအကျယ် ဂယက်ထခဲ့ပြီး သမ္မတနဲ့ ပူးပေါင်းကြံစည်ခဲ့ကြောင်း စွပ်စွဲမှုကြောင့် နိုင်ငံရဲ့ ရဲတပ်ဖွဲ့ အကြီးအကဲ ချိုဂျီဟိုလည်း အဖမ်းခံထားရကြောင်း သိရပါတယ်။
ကိုးကား: CNN
