ထိုင်းနိုင်ငံက စျေးတန်းတစ်ခုမှာ ပစ်ခတ်မှု ဖြစ်ပွားပြီး ၁ ဦးသေ၊ ၂ ဦး အပြင်းအထန် ဒဏ်ရာရခဲ့ကြောင်း သိရပါတယ်။
ဆမွတ် ပရာကန် ဒေသမှာရှိတဲ့ ဖရာ ပရာဒါအန်မှာရှိတဲ့ အဟောင်းတန်း စျေးတစ်ခုမှာ ဧပြီ ၄ ရက် မွန်းတည့်ချိန် ဝန်းကျင်က ပစ်ခတ်မှု ဖြစ်ခဲ့တာပါ။ တွန်ဆိုင်စျေးတန်း စဖွင့်တဲ့နေ့မှာ ဖြစ်ပွားခဲ့တဲ့ ပစ်ခတ်မှုအပြီး ရဲတွေနဲ့ ကယ်ဆယ်ရေးတွေ ရောက်ရှိလာချိန်မှာတော့ သွေးအိုင်ထဲမှာ ကျည်ဆန်ဒဏ်ရာတွေနဲ့ လဲနေတဲ့ အမျိုးသားကို ရှာတွေ့ခဲ့ပါတယ်။
နောက်ထပ် ၂ ယောက်ကလည်း ဒဏ်ရာတွေ ရထားတာကြောင့် အခင်းဖြစ်တဲ့ နေရာမှာ အရေးပေါ် ကုသပေးပြီး အဲဒီနောက် နီးစပ်ရာ ဆေးရုံတစ်ခုဆီ လွှဲပြောင်း ပို့ဆောင်ခဲ့ရကြောင်း သိရပါတယ်။
ဖြစ်စဉ် အသေးစိတ်ကို မသိရသေးပေမယ့် မျက်မြင်တွေကတော့ သေနတ်သံ ၁၀ ချက်လောက်ကို ကြားခဲ့ရတယ်လို့ ပြောပါတယ်။ ရဲတွေက အခင်းဖြစ်တဲ့ နေရာမှာ ကျည်ခွံ အနည်းဆုံး ၈ ခု ရှာတွေ့ထားတယ်လို့ ဆိုပါတယ်။
Public Service Announcement
ဘာ့ဒ်လို့သာ နာမည်ဖော်ပြထားတဲ့ အသက် ၃၀ အရွယ် သံသယ တရားခံ အမျိုးသားကိုတော့ ရဲတွေက လိုက်လံ ရှာဖွေနေဆဲပါ။
ကနဦး စုံစမ်းမှုတွေအရ စျေးတန်းနဲ့ ဆက်စပ်တဲ့ အစောင့်အရှောက် အဖွဲ့တစ်ခုနဲ့ ပြိုင်ဘက်တွေကြား ပြဿနာတွေကနေ ပစ်ခတ်မှု စတင်ဖြစ်ပွားခဲ့တယ်လို့ သိရပါတယ်။ လတ်တလောမှာတော့ သံသယ တရားခံကို ရှာဖွေနေဆဲဖြစ်ပြီး နောက်ဆက်တွဲ စုံစမ်းမှုတွေလည်း ဆက်လက်လုပ်ဆောင်နေကြောင်း ရဲတွေက ပြောကြားထားပါတယ်။
ကိုးကား: Bangkok Post
