ထိုင်းရဲတပ်ဖွဲ့ရဲ့ လေယာဉ်ငယ် ပျက်ကျပြီး အနည်းဆုံး ၅ ဦး သေဆုံး

ထိုင်းနိုင်ငံမှာ ရဲတပ်ဖွဲ့ရဲ့ လေယာဉ်ငယ်တစ်စီး ပင်လယ်ကမ်းခြေနားကို ပျက်ကျခဲ့ရာက အနည်းဆုံး ၅ ဦး သေဆုံးခဲ့တယ်လို့ သိရပါတယ်။

ထိုင်းရဲ့ Bangkok Post သတင်းဌာနက ဟွာဟင် လေဆိပ်နားက ကမ်းလွန်ရေပြင်ကို ပျက်ကျခဲ့တဲ့ လေယာဉ်မှာ လေယာဉ်မှူး ၃ ဦး အပါအဝင် ၅ ဦးသေပြီး ၁ ဦး ပျောက်ဆုံးနေတယ်လို့ ဖော်ပြထားပြီး တချို့ မီဒီယာတွေမှာတော့ အသေအပျောက်ကို ၆ ဦးလို့ ရေးသားထားတာ တွေ့ရပါတယ်။

ဧပြီ ၂၅ ရက်နေ့ မနက်ပိုင်းက လေယာဉ်ဟာ ဖက်ချာဘူရီ ပြည်နယ်၊ ချာအမ်ခရိုင်ထဲက ထိုင်းပင်လယ်ကွေ့ ကမ်းလွန်မှာ ပျက်ကျခဲ့တာလို့ ဆိုပါတယ်။ လေယာဉ် ပျက်ကျတဲ့ နေရာဟာ ဘေဘီဂရန်း ဟွာဟင်း ဟိုတယ်နဲ့ သိပ်မဝေးဘူးလို့လည်း သိရပါတယ်။

DHC-6-400 အမျိုးအစား လေယာဉ်ဟာ လေ့ကျင့်ရေးအတွက် လေထီးဆင်း တပ်ဖွဲ့ဝင် တချို့ကို သွားရောက် ခေါ်ဆောင်ဖို့ ပျံတက်ပြီး မကြာခင်မှာ ပျက်ကျခဲ့တာလို့ ဆိုပါတယ်။ လေယာဉ်ပေါ်မှာ လေယာဉ်မှူး ၃ ယောက်၊ စက်ပြင်အရာရှိ ၂ ဦးနဲ့ လေယာဉ် အင်ဂျင်နီယာ ၁ ဦးတို့ လိုက်ပါသွားခဲ့တာပါ။ သေဆုံးသူတွေထဲမှာ ရဲမှူးကြီးအဆင့် အရာရှိကြီး တစ်ဦးလည်း ပါဝင်ခဲ့ပါတယ်။

Public Service Announcement

ထိုင်းအာဏာပိုင်တွေက လေယာဉ်ပျက်ကျအပြီး ကယ်ဆယ်ရေး လုပ်ငန်းတွေကို အမြန်ဆုံး တုံ့ပြန် ဆောင်ရွက်ခဲ့ကြောင်း ပြောပါတယ်။

လေယာဉ် ပျက်ကျရမှု အကြောင်းရင်းကို တိတိကျကျ မသိရသေးဘဲ စုံစမ်းစစ်ဆေးမှုတွေ ဆက်လက် လုပ်ဆောင်နေဆဲ ဖြစ်ပါတယ်။

ကိုးကား: Bangkok Post