မေ – ၂၃ ၊၂၀၂၅ /People’s Spring
ဘင်္ဂလားဒေ့ရှ် ယာယီ အစိုးရအဖွဲ့ရဲ့ ခေါင်းဆောင် မူဟာမက် ယူနွတ်စ်ဟာ ရာထူးကနေ နုတ်ထွက်ဖို့ စဉ်းစားနေကြောင်း သတင်းတွေ ထွက်ပေါ်လာပါတယ်။
ဝန်ကြီးချုပ်ဟောင်း ရှိတ်ခ်ဟာဆီနာရဲ့ အစိုးရ ပြုတ်ကျစေခဲ့တဲ့ လူထုအုံကြွမှုကြီးအပြီး ဖွဲ့စည်းထားတဲ့ ယာယီ အစိုးရမှာ ဘဏ်လုပ်ငန်းရှင်နဲ့ ငြိမ်းချမ်းရေး နိုဘယ်လ်ဆုရှင် ယူနွတ်စ်က အတိုင်ပင်ခံချုပ် ရာထူးကို လက်ခံယူပြီး ဦးဆောင်နေတာ ဖြစ်ပါတယ်။
ယူနွတ်စ်ရဲ့ ယာယီ အစိုးရဟာ ရွေးကောက်ပွဲ ကျင်းပပြီး ဘင်္ဂလားဒေ့ရှ် နိုင်ငံကို ဒီမိုကရေစီ နည်းလမ်းနဲ့အညီ တင်မြှောက်တဲ့ အစိုးရလက်ထဲ ပြန်လည် အပ်နှံမယ်လို့ ကတိပေးထားပါတယ်။
Public Service Announcement
ဒါပေမဲ့ ယူနွတ်စ်ဟာ နိုင်ငံရေးပါတီ အားလုံးဆီက ပူးပေါင်း ပါဝင်မှုကို လိုလားနေတယ်လို့ အမျိုးသား နိုင်ငံသားပါတီ (NCP) အကြီးအကဲ နာဟစ်ဒ် အစ္စလာမ်က ပြောပါတယ်။
သူဟာ အတိုင်ပင်ခံချုပ်နဲ့ တွေ့ဆုံခဲ့ကြောင်း၊ ပြီးတော့ နိုင်ငံရေး ပါတီတွေက မထောက်ခံဘူးဆိုရင် နုတ်ထွက်ဖို့ စဉ်းစားနေတယ်လို့ ယူနွတ်စ်က သူ့ကို ပြောပြခဲ့ကြောင်း နာဟစ်ဒ်က ဆိုပါတယ်။ နောက်ပြီး ယူနွတ်စ် နုတ်ထွက်နိုင်ခြေ သတင်းတွေကလည်း ပျံ့နှံ့နေတာကြောင့် သူဟာ ဒီကိစ္စကို ယူနွတ်စ်နဲ့ သေသေချာချာ ဆွေးနွေးဖို့ လိုလားကြောင်းလည်း နာဟစ်ဒ်က မှတ်ချက် ပေးသွားပါတယ်။
အသက် ၈၄ နှစ်အရွယ် ယူနွတ်စ်ဟာ နိုင်ငံရေး ပါတီတွေနဲ့ လက်တွဲ အလုပ်လုပ်သွားချင်ပေမယ့် သူ့ဆီကို ဗဟိုပြု ကျရောက်နေတဲ့ မြောက်မြားလှစွာသော တောင်းဆိုမှုတွေအတွက် စိတ်ပျက်နေတယ်လို့ နီးစပ်သူတွေက ပြောပါတယ်။
ယူနွတ်စ်က ပါတီတွေ အနေနဲ့ သူ့ကို မထောက်ခံချင်ဘူးဆိုရင် သူလည်း နုတ်ထွက်ဖို့ စဉ်းစားထားတယ်လို့ အစိုးရ အဖွဲ့ဝင်တွေကို အသိပေးခဲ့ကြောင်း သူ့ရဲ့ အတွင်းစည်း အရာရှိ တစ်ယောက်က ပြောပါတယ်။
လူသိများတဲ့ ပါတီတစ်ခုဖြစ်တဲ့ ဘင်္ဂလားဒေ့ရှ် အမျိုးသားရေးပါတီ (BNP)က ယာယီ အစိုးရကို ဆန္ဒပြတဲ့ ချီတက်ပွဲတစ်ခုကို မြို့တော် ဒါကာမှာ ဦးဆောင် ကျင်းပခဲ့တဲ့နောက် ယူနွတ်စ်က ရာထူးက နုတ်ထွက်မယ်ဆိုတဲ့ သဘောမျိုး တုံ့ပြန်လာတာ ဖြစ်ပါတယ်။
BNPက ယာယီ အစိုးရ အနေနဲ့ ရွေးကောက်ပွဲ ကျင်းပရေးနဲ့ ပတ်သက်တဲ့ လမ်းပြမြေပုံကို မြန်မြန်ဆန်ဆန် မကြေညာဘူးဆိုရင် အစိုးရနဲ့ ပူးပေါင်းနေမှုတွေကို ရုပ်သိမ်းမယ်လို့ ခြိမ်းခြောက်ထားပါတယ်။
ကိုးကား – Deccan Herald ၊ ဓာတ်ပုံ – reuters
