ဇေအောင်/People’s Spring
စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့ပေါ်တွင် အရက်ဆိုင်ထိုင်နေသော ရဲတပ်ကြပ်တစ်ဦး ပစ်ခတ်ခံရပြီး သေဆုံးခဲ့ကြောင်း သတင်းရရှိသည်။
အောက်တိုဘာ ၈ရက် ညနေ ၅နာရီခန့်က ဇီးကုန်းမြို့ရှိ အရက်ဆိုင်၌ အရက်သောက်နေသော ရဲတပ်ကြပ် ချင်းလေး(ခ)ခွါကြီး(ခ)ရန်ရှင်းခွါတို့အဖွဲ့အား တော်လှန်ရေးအဖွဲ့များက ဝင်ရောက်ပစ်ခတ်ရာ ရဲတပ်ကြပ်ကြီးရန်ရှင်းခွာဆိုသူ သေဆုံးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
“ဇီးကုန်းမြို့လယ်ခေါင်မှာဖြစ်တာပါ။ တပ်ကြပ်ရန်ရှင်းခွါ ဗိုက်ပွင့်ထွက်ပြီးသေတယ်။”ဟု KBU-တောလေး ပကဖခရိုင်လှုပ်ရှားအဖွဲ့၏ တာဝန်ရှိသူက ပြောသည်။
Public Service Announcement
အဆိုပါ စစ်ဆင်ရေးအား KBU-တောလေး ပကဖခရိုင်လှုပ်ရှားအဖွဲ့နှင့် တော်လှန်ရေးညီနောင်များပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။
စက်တင်ဘာ ၂၇ နှင့် ၂၈ ရက်ကလည်း အာဏာသိမ်းစစ်တပ်၏ ဒရုန်းဖြင့်ဗုံးချတိုက်ခိုက်မှုနှင့် ပစ်ခတ်သတ်ဖြတ်မှုကြောင့် နှစ်ရက်အတွင်း ကလေးငယ်တစ်ဦးအပါအဝင် ဒေသခံပြည်သူ ၇ ဦး သေဆုံးခဲ့သည်။
ထို့အပြင် စက်တင်ဘာ ၂၉ရက်ကလည်း ကန့်ဘလူမြို့နယ်၊ ပင့်သာတိုက်နယ်အတွင်းရှိ ကျေးရွာနှစ်ရွာအား စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့ရာ ဘုန်းကြီးကျောင်းနှင့် နေအိမ် ၄လုံး ပျက်စီးခဲ့သေးသည်။
