ဇေအောင်/People’s Spring
စစ်ကိုင်းတိုင်း၊ ချောင်းဦးမြို့နယ်ရှိ မုံရွာခရိုင် အမှတ် (၁၂)တပ်ရင်း၊ တပ်ခွဲ (၃)၏ စခန်းအနီးကို စစ်ကောင်စီက လေကြောင်းတိုက်ခိုက်ခဲ့ရာ ထိခိုက်ပျက်စီးမှုများရှိကြောင်း သတင်းရရှိသည်။
အောက်တိုဘာ ၃၀ရက် ညနေ ၃ နာရီခွဲခန့်က ချောင်းဦးမြို့နယ်အတွင်းရှိ မုံရွာခရိုင် အမှတ် (၁၂) တပ်ရင်း၊ တပ်ခွဲ (၃) လျှပ်စီးတပ်ခွဲ၏ စခန်းအား စစ်ကောင်စီက ဂျက်ဖိုက်တာတစ်စီးဖြင့် နာရီဝက်ကြာ ပစ်ခတ်တိုက်ခိုက်ခဲ့ကြောင်း ယင်းတပ်ခွဲတာဝန်ရှိသူက ပြောသည်။
စခန်းအတွင်း ရော့ကတ်၂လုံးကျရောက် ပေါက်ကွဲခဲ့ရာ ရဲဘော်တစ်ဦးဒဏ်ရာရရှိခဲ့ပြီး ကားတစ်စီးပျက်စီးခဲ့ကြောင်း ၎င်းက ပြောသည်။
Public Service Announcement
“လက်နက်ခဲယမ်းထိခိုက်မှုတော့ညမရှိဘူး။ ထိခိုက်တာကတော့ စခန်းအနီးမှာရှိတဲ့ ဘုရား အုတ်တံတိုင်း တစ်နေရာပေါက်သွားတယ်။ ကျွန်တော်တို့ ကားတစ်စီး ပျက်စီးသွားတယ် ဒါလောက်ပါပဲ။”ဟု လျှပ်စီးတပ်ခွဲ တာဝန်ရှိသူက ပြောသည်။
စခန်း၏ အဆောက်ဦးများ ပျက်စီးမှုမရှိသော်လည်း အရေးပေါ် စခန်းတည်နေရာ အသစ်ပြောင်းရွေ့ရန် စီစဥ်နေပြီး အကူအညီများလိုအပ်နေသည်ဟု သိရသည်။
ယနေ့ (နိုဝင်ဘာ ၁ ရက်) နံနက်ပိုင်းကလည်း မုံရွာ-မန္တလေးလမ်းမကြီးပေါ်၊ ချောင်းဦးမြို့နှင့်ငါးယှန်ရွာကြား၌ စစ်ကောင်စီတပ်အား ကာကွယ်ရေးအဖွဲ့များက ပစ်ခတ်ရာ စစ်သားတစ်ဦးသေဆုံး၍ ၃ ဦး ဒဏ်ရာရကြောင်း မုံရွာခရိုင်အမှတ်(၁၁)တပ်ရင်းက ထုတ်ပြန်ထားသည်။
