အောက်တိုဘာလထဲ တိုက်ပွဲအကြိမ်​ရေ နှစ်​ရာ​ကျော်မှာ စစ်​ကောင်စီတပ်​တွေ ဘယ်​လောက်ထိသေဆုံးခဲ့သလဲ

ကေအဲန်ယူ ကရင်အမျိုးသားအစည်းအရုံး ထိန်းချုပ်နယ်မြေဖြစ်တဲ့ မူတြော်(ဖာပွန်)ခရိုင် တပ်မဟာ ၅ နယ်မြေအတွင်းက တိုက်ပွဲအခြေအနေတွေနဲ့ ပတ်သက်လို့ KNLA တပ်မဟာ ၅ ပြောရေးဆိုခွင့်ရှိသူ ဒုဗိုလ်မှူးကြီး စောကလယ်ဒိုနဲ့ လူထု​နွေဦးက ဆက်သွယ်မေးမြန်းထားပါတယ်။

KNLA တပ်မဟာ ၅ ထိန်းချုပ်နယ်မြေအတွင်းမှာ စစ်ကောင်စီတပ်ဖွဲ့တွေက စစ်ရေးလှုပ်ရှားမှုတွေ ပိုလုပ်ဆောင်လာတာကြောင့် နယ်မြေခံ KNLA တပ်မဟာ ၅ တပ်ဖွဲ့တွေနဲ့ နေ့စဉ်လိုလို တိုက်ပွဲတွေဖြစ်ပွားခဲ့တာပါ။

အောက်တိုဘာလအတွင်း ဖာပွန်ခရိုင် တပ်မဟာ ၅ နယ်မြေထဲမှာ တိုက်ပွဲပေါင်း ၂၀၄ ကြိမ်ဖြစ်ပွားခဲ့ပြီး စစ်ကောင်စီဘက်က ၉၃ ဦးသေဆုံးကာ ၉၆ ဦးထိခိုက်ဒဏ်ရာရရှိသွားခဲ့ပါတယ်။

သေဆုံးသူတွေထဲမှာ တပ်ရင်းမှူတစ်ဦး တပ်ခွဲမှူးနှစ်ဦးပါဝင်ပြီး ဒဏ်ရာရရှိသူတွေထဲမှာ ဗိုလ်မှူးတစ်ဦးပါဝင်တယ်လို့ စောကလယ်ဒိုက ပြောပါတယ်။KNLA တပ်မဟာ ၅ နယ်မြေ ဖာပွန်ခရိုင်ထဲကို စစ်ဆင်ရေးဝင်ရောက်လှုပ်ရှားတဲ့ စစ်ကောင်စီတပ်ဖွဲ့တွေဟာ တပ်အဖွဲ့အသစ်တွေဖြစ်နေတဲ့အပြင် နယ်မြေမကျွမ်းကျင်တာတွေကြောင့် တိုက်ပွဲမှာအကျအဆုံးများခဲ့တာဖြစ်ပြီး တချို့ စစ်ကောင်စီတပ်ဖွဲ့တွေဟာ သင်တန်းမတက်ဖူးတဲ့ တပ်သားတွေပါ ပါဝင်တယ်လို့ စောကလယ်ဒိုက ပြောပါတယ်။

Public Service Announcement

စစ်ကောင်စီဟာ ငါးလတာအပစ်ရပ်တယ်လို့ ပြောဆိုပြီးကြေညာထားပေမယ့် တကယ့်လက်တွေ့မှာတော့ လိုက်နာမှုမရှိဘဲ ကေအဲန်ယူနယ်မြေအတွင်း စစ်ရေးဝင်ရောက်လှုပ်ရှားနေပြီး တိုက်ပွဲတွေနေ့စဉ်လိုလို ဖြစ်ပွားနေတာ ဖြစ်ပါတယ်။