ဇူလိုင် ၁၊ ၂၀၂၆။ ထားမြတ်/People’s Spring
ချင်းပြည်နယ်၊ မင်းတပ်မြို့နယ်ကို စစ်တပ်က လေကြောင်းဗုံးကြဲတိုက်ခိုက်မှုတွေ ဆက်တိုက်ပြုလုပ်လျက်ရှိရာ မနေ့က ဇွန် ၃၀ရက်မနက်ကနေ ဒီကနေ့ ဇူလိုင် ၁ရက် မနက်အထိ ၂၄နာရီအတွင်း လေကြောင်းကနေ ဗုံးအလုံးရေ ၁၀၀ ကျော်ကြဲချတိုက်ခိုက်ခဲ့တယ်လို့ ဒေသခံက အသိပေးထားပါတယ်။
စစ်တပ်က မင်းတပ်မြို့ ပြန်ထိန်းချုပ်ဖို့ ကြိုးပမ်းနေလို့ ချင်းတော်လှန်ရေး ပူးပေါင်းတပ်နဲ့ တိုက်ပွဲပြင်းထန်နေတာဖြစ်ပြီး စစ်တပ်က လေကြောင်း တိုက်ခိုက်မှု နေ့တိုင်းပြုလုပ်နေတာပါ။
စစ်တပ်က ဇွန် ၃၀ရက်မနက် ၊ ဇွန် ၃၀ရက် ညနဲ့ ဇူလိုင် ၁ရက်မနက်တွေမှာ မင်းတပ်အရှေ့ခြမ်း နေရာကို တိုက်လေယာဉ် ၊ Y12 လေယာဉ်တွေ အသုံးပြု တိုက်ခိုက်ခဲ့တာပါ။
Public Service Announcement
ဒီကနေ့မနက်အစောမှာ တိုက်လေယာဉ် ၂စီးနဲ့ ၄ကြိမ်ကို ဗုံး ၈လုံး ကြဲခဲ့သလို Y12 လေယာဉ်နဲ့ ၁၄ကြိမ်ကို ဗုံး အလုံး ၄၀ ကျော်ကြဲချတိုက်ခိုက်ခဲ့ဟု ဒေသခံက အသိပေးပါတယ်။
မနေ့က မနက်မှာလည်း Y12နဲ့ ၈ကြိမ်ကို ဗုံး ၂၄လုံး၊ မနေ့က ညမှာလည်း Y12နဲ့ ၁၂ ကြိမ် ဗုံးအလုံး ၄၀ ကျော် ကြဲချတိုက်ခိုက်ခဲ့တာလို့ ဆိုပါတယ်။ ဒါကြောင့် ဇွန် ၃၀ရက်မနက်ကနေ ဒီကနေ့မနက်အထိ လေကြောင်း တိုက်ခိုက်မှုပေါင်း ၄၀ ကြိမ် ဗုံးအလုံးရေ ၁၁၂ လုံးထက်မနည်း ကြဲချတိုက်ခိုက်ခဲ့တာ ဖြစ်ပါတယ်။
စစ်တပ်ဟာ မင်းတပ်မြို့မှာ တိုက်ပွဲဖြစ်ပွားတဲ့နေရာတွေသာမက တိုက်ပွဲမရှိတဲ့ ပြည်သူလူထုနေထိုင်ရာ တွေကိုလည်း လေကြောင်းဗုံးကြဲခဲ့လို့ ကလေးငယ်တွေ အပါအဝင် အရပ်သားသေဆုံးမှုတွေရှိခဲ့ပါတယ်။ဇွန်လ ၂၉ရက်က စစ်တပ်ရဲ့ လေကြောင်း တိုက်ခိုက်မှုကြောင့် မင်းတပ်မြို့အနီးကျေးရွာက အသက် ၁၀နှစ်အောက်မိန်းကလေးငယ် ၃ဦးသေဆုံးခဲ့တယ်လို့ ဒေသခံက ပြောပါတယ်။ သေဆုံးသွားတဲ့ ကလေးငယ် သုံးယောက်ဟာ ဆွေမျိုးညီအမတွေဖြစ်တယ်လို့ ဒေသခံက ပြောပါတယ်။
အာဏာသိမ်းစစ်တပ်ဟာ မင်းတပ်နဲ့ ကန် ပက်လက်မြို့ပြန်ထိန်းချုပ်ဖို့ မေလကတည်းက ထိုးစစ်ဆင်နေတာဖြစ်ပါတယ်။ ဒီလို ထိုးစစ်ဆင်လာလို့ ချင်းပြည်သူ့အစည်းအရုံး(CPU/CPA) ပူးပေါင်းတပ်နဲ့ စစ်တပ်အကြား တိုက်ပွဲ ၁လကျော်ကြာမြင့်နေပြီဖြစ်ပါတယ်။
