ဇူလိုင်-၁၊ ၂၀၂၆။ စိုင်းနောင်/People’s Spring
မြန်မာ-ထိုင်းနယ်စပ်မြို့ဖြစ်တဲ့ မြဝတီမြို့မှာ စက်သုံးဆီ သိုလှောင်ထားတဲ့အိမ် မီးလောင်ပြီး လသားအရွယ်ကလေးငယ်တစ်ဦးသေဆုံးခဲ့သလို ကလေးငယ်ရဲ့ဖခင်ဖြစ်သူလည်း ဒဏ်ရာအပြင်းအထန်ရရှိသွားပါတယ်။
ဒီနေ့ ဇူလိုင် ၁ရက် ညနေ ၅ နာရီ ၁၀မိနစ်ခန့်မှာ မြဝတီမြို့ အမှတ်(၄)ရပ်ကွက်၊ ချစ်ကြည်ရေးလမ်းက နေအိမ်တစ်လုံး မီးလောင်ကျွမ်းခဲ့တာဖြစ်ပါတယ်။
“ဆီဂါလန်ပုံးထဲကနေ နောက်ထပ်ပုံးအသေးတစ်ခုထဲကို ထည့်ချိန်မှာ မီးလောင်တာ။ ဘေးနားမှာက ခြင်ဆေးခွေထွန်းထားတာ။ ဆုံးသွားတဲ့ ကလေးက ၂လသားလေးဗျာ။ ကလေးရဲ့အဖေကလည်း စိုးရိမ်ရတယ်”လို့ မြဝတီမြို့ခံတစ်ဦးက ပြောပါတယ်။
Public Service Announcement
မီးသတ်ကားတွေလာရောက် ငြှိမ်းသတ်ခဲ့လို့ ဘေးအိမ်တွေကို ကူးစက်လောင်ကျွမ်းခြင်းမရှိခဲ့ဘူးလို့ သိရပါတယ်။ အာဏာသိမ်းစစ်တပ်က စက်သုံးဆီရောင်းဝယ်မှုကို ကန့်သတ်ထားချိန်မှာ မြဝတီမြို့အပြင် တခြားမြို့တွေမှာပါ ဆီသိုလှောင်ပြီး တပိုင်တနိုင်ရောင်းဝယ်မှုတွေရှိနေပါတယ်။
မြဝတီမြို့မှာ ဆီသိုလှောင်တဲ့အိမ် မီးလောင်ပြီး လူသေဆုံးမှု ပြီးခဲ့တဲ့ ဇွန်လ ၁၉ရက်ကလည်း ဖြစ်ပွားခဲ့ပါတယ်။ ဇွန်လ ၁၉ ရက် ညနေက မြဝတီမြို့၊ အမှတ် (၅) ရပ်ကွက်၊ ခေါက်မလိလမ်းမှာ ဆီသို လှောင်ထားတဲ့အိမ်တစ်လုံး မီးလောင်ပြီး အသက် ၁၄ နှစ်အရွယ် မိန်းကလေးတစ်ဦး၊ အသက် ၉လအရွယ် ယောက်ျားလေးငယ်တစ်ဦး သေဆုံးခဲ့ပါတယ်။
