ဇူလိုင်-၂၉၊၂၀၂၆။ထားမြတ်/People’s Spring
အာဏာသိမ်းစစ်တပ် ယာဥ်တန်းနဲ့ စစ်သားတွေကို ပြည်သူ့ကာကွယ်ရေးတပ်မတော်(PDF)က FPV ဒရုန်းတွေနဲ့ တိုက်ခိုက်ခဲ့တဲ့ရုပ်သံမှတ်တမ်းကို PDF စစ်ရုံးချုပ်က ဒီကနေ့ မှာ ထပ်မံထုတ်ပြန်ပါတယ်။
စစ်ဆင်ရေးနယ်မြေ နဲ့ အချိန်နေ့ရက်တွေကို ဖော်ပြမထားပေမဲ့ အာဏာသိမ်းစစ်တပ်ရဲ့ တပ်ဖွဲ့ဝင် အများအပြား စုဝေးနေတဲ့ နေရာအချို့နဲ့ စစ်တပ်ယာဉ်တန်း သွားလာနေစဉ် မှာFPV ဒရုန်းနဲ့ တိုက်ခိုက်ခဲ့တဲ့ရုပ်သံမှတ်တမ်းတွေကို ဇူလိုင် ၂၉ရက်မှာထုတ်ပြန်ခဲ့တာပါ။
စစ်ဆင်ရေးနယ်မြေအသီးသီးရှိ စစ်ဆင်ရေးများအတွင်း ရန်သူစစ်တပ်အား FPV ဒရုန်းတွေနဲ့ တိုက်ခိုက်ခဲ့တာ ဖြစ်တယ်လို့သာ PDF စစ်ရုံးချုပ်က ဖော်ပြထားပါတယ်။ စစ်သားတွေအုပ်စုလိုက် လမ်းဘေးမှာ အနားယူနေတုန်း ၊စစ်တပ်ယာဥ်တန်းတွေမောင်နှင်နေစဥ်မှာ FPV ဒရုန်းတွေက အနီးထိပျံသန်းပြီးတိုက်လိုက်တာကို ဗီဒီယိုမှာမြင်တွေရပါတယ်။
Public Service Announcement
“အကြမ်းဖက်စစ်တပ်သည် စစ်ဘေးရှောင် ပြည်သူ့နေအိမ်များမှ ခိုးယူဓားပြတိုက်ရန်သော်လည်းကောင်း၊ ပြည်သူများ၏ နေအိမ်များကို မီးရှို့ဖျက်ဆီးရန်သော်လည်းကောင်း၊ ရောက်လေရာဒေသတွင် နယ်မြေထိန်းချုပ်ရေးအကြောင်းပြပြီး အပြစ်မဲ့ပြည်သူများကို အကြမ်းဖက်သတ်ဖြတ် ရန်သော် လည်းကောင်း နေရာအနှံ့သို့ ပေါ်တာဆွဲခံ ပစများ
(ပြည်သူ့စစ်များ)ကို လူသားတံတိုင်းအဖြစ်သုံး၍ စစ်ကြောင်းထိုးဝင်ရောက် လျက်ရှိရာ မိမိတို့ ပြည်သူ့ကာကွယ်ရေးတပ်မတော်မှ ရဲဘော်များအနေဖြင့်လည်း စစ်မျက်နှာအသီးသီးတွင် မိမိတို့ ကိုယ်စွမ်းဉာဏ်စွမ်းရှိသလောက် နည်းလမ်းမျိုးစုံဖြင့် အပြင်းအထန်တုံ့ပြန်တိုက်ခိုက်လျက်ရှိပြီး ရန်သူ့တပ်သားများမှာလည်း နေ့စဉ် သေဆုံးအထိနာခြင်း၊ အပြင်းအထန်ဒဏ်ရာရခြင်းနှင့် အလင်းဝင်ခြင်း များ ရှိကြောင်း ဤရုပ်သံနှင့်တကွ အသိပေးအပ်ပါသည်” လို့ဖော်ပြထားပါတယ်။
အခုနှစ်ပိုင်းမှာ PDFတွေ နဲ့ တိုင်းရင်းသားတော်လှန်ရေးတပ်တွေဟာ FPV ဒရုန်းတွေ အသုံးပြုပြီး စစ်တပ် ရဟတ်ယာဉ်တွေ ၊ စစ်တပ်ရေယာဉ်တွေ၊ကားတွေ၊စစ်သားတွေကို မကြာခဏအထိနာအောင် တိုက်ခိုက်လာနိုင်ပါတယ်။
စစ်တပ်ကလည်းနည်းပညာမြင့်ဒရုန်းတွေ၊ဂျန်မာတွေ အသုံးပြုလာပေမဲ့ ဒေသအချို့ တိုက်ပွဲတွေမှာတော့ တော်လှန်ရေးဘက်က FPV ဒရုန်းတွေ အသုံးပြုပြီး စစ်တပ်အထိနာအောင် တိုက်ခိုက်နိုင်နေဆဲဖြစ်ကြောင်း စစ်ရေး သတင်းရင်းမြစ်က ပြောပြထားပါတယ်။
ကချင်ဒေသနဲ့ ချင်းမြောက်ပိုင်း တိုက်ပွဲတွေ၊ မကွေးနဲ့ စစ်ကိုင်းတိုင်းတိုက်ပွဲတွေမှာ တော်လှန်ရေးတပ်တွေက စစ်တပ်အထိနာအောင် FPV ဒရုန်းနဲ့ တိုက်ခိုက်နိုင်ခဲ့မှု မြင်ကွင်းတွေကို ၂၀၂၆ ခုနှစ်အတွင်းမှာ ပိုမိုတွေ့မြင်လာရတာလည်းဖြစ်ပါတယ်။ ချင်းတောင်ပိုင်း တိုက်ပွဲတွေမှာလည်း တော်လှန်ရေးတပ်တွေက စစ်တပ်ကို FPV ဒရုန်းတွေနဲ့ အထိနာအောင်တိုက်ခိုက်နိုင်ခဲ့ပါတယ်။
