ကော့ကရိတ်မြို့နယ်ရဲ့ လုံခြုံရေးအခြေအနေအရဆိုပြီး ညမထွက်အရအမိန့်ကို ည ၈ နာရီကနေ မနက် ၄ နာရီအချိန်အထိ စစ်ကောင်စီမြို့နယ်အုပ်ချုပ်ရေးအဖွဲ့က မနေ့ ဧပြီ ၁၉ ရက်ရက်စွဲနဲ့ ပြင်ဆင်သတ်မှတ်ထုတ်ပြန်လိုက်ပါတယ်။
ပြီးခဲ့တဲ့ ၂၀၂၁ ခုနှစ် က စစ်တပ်က အာဏာသိမ်းပြီးတဲ့နောက် ကရင်ပြည်နယ် ကော့ကရိတ်မြို့နယ်အတွင်းမှာ လူစုလူဝေးလုပ်တာ၊ ဟောပြောစီတန်းတာတွေ မပြုလုပ်ဖို့နဲ့ ည ၁၀ နာရီကနေ မနက် ၄ နာရီအထိ ညမထွက်ရအမိန့်ကို ထုတ်ပြန်ထားခဲ့တာပါ။
အခုအခါမှာတော့ ကော့ကရိတ်မြို့နယ်ရဲ့လုံခြုံရေးအရဆိုပြီး စစ်ကောင်စီအုပ်ချုပ်ရေးအဖွဲ့က ည ၈ နာရီကနေ မနက် ၄ နာရီအချိန်ထိ ညမထွက်ရအမိန့်ကို ပြင်ဆင်သတ်မှတ်လိုက်ကာ ဒီအမိန့်ဟာ မြို့နယ်တစ်ခုလုံးအတွင်း သက်ရောက်မှာဖြစ်ပြီး နှစ်လသက်တမ်းအထိရှိတယ်လို့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီက အခုလို ညမထွက်ရအမိန့်ကို ပြင်ဆင်ပြောင်းလဲသတ်မှတ်လိုက်တာကို ကော့ကရိတ်နယ်မြေအတွင်းမှာရှိတဲ့ ကေအဲန်ယူ တပ်မဟာ ၇ တပ်မဟာ ၆ ဆက်ဆံရေးတွေထံအပြင် အခြားလက်နက်ကိုင်အဖွဲ့တွေဖြစ်တဲ့ မွန်ပြည်သစ်ပါတီနဲ့ ကရင်ငြိမ်းချမ်းရေးကောင်စီ ဆက်ဆံရေးရုံးတွေထံ စာပေးပို့အကြောင်းထားတယ်လို့ သိရပါတယ်။
Public Service Announcement
လက်ရှိအချိန်မှာလည်း ကေအဲန်ယူ တပ်မဟာ ၆ ထိန်းချုပ်နယ်မြေဖြစ်တဲ့ ကော့ကရိတ်-မြ၀တီ အာရှလမ်းမ၊ ကော့ကရိတ်မြို့နယ် တောင်ဘက်ပိုင်းဒေသက ကျေးရွာတွေနဲ့ တောင်ကြာအင်းကျေးရွာတွေဘက်မှာ စစ်ကောင်စီက စစ်ရေးလှုပ်ရှားမှုတွေရှိနေတာကြောင့် စစ်ရေးတင်းမာမှုတွေ ရှိနေဆဲပဲဖြစ်ပါတယ်။
တဖက်မှာလည်း ကေအဲန်ယူ-ဒူးပလာယာခရိုင်အတွင်းမှာ ပြည်သူလူထုရဲ့လုံခြုံရေးအတွက် ကေအဲန်ယူက ည ၇ နာရီကနေ မနက် ၆ နာရီအထိ သွားလာတာတွေမပြုလုပ်ကြဖို့ စည်းကမ်းချက်ထုတ်ပြန်ထားပြီး ဒူးပလာယာခရိုင်အတွင်းမှာ ကော့ကရိတ်၊ ကျုံဒိုး၊ နို့တကောနဲ့ ဝင်းရေးမြို့နယ်လည်း ပါဝင်တာဖြစ်ပါတယ်။
