မကွေးတိုင်း၊ မြိုင်မြို့နယ်မြောက်ပိုင်းတွင် ကန်နီပျူစောထီးကျေးရွာရှိ စစ်ကောင်စီတပ်နှင့် ပျူများက ကျေးရွာနှစ်ရွာကို ဝင်ရောက်ဖျက်ဆီးမီးရှို့ခဲ့၍ နေအိမ် ၁၆လုံး ပြာကျခဲ့ကြောင်း ဒေသတွင်း သတင်းရင်းမြစ်များက ပြောသည်။
ယမန်နေ့ (စက်တင်ဘာလ ၅ ရက်) နံနက် ၉နာရီခွဲခန့်က မြိုင်မြို့နယ်မြောက်ပိုင်း ကန်နီ(ပျူ)ရွာတွင် အထိုင်ချတပ်စွဲထားသည့် အကြမ်းဖက်စစ်ကောင်စီတပ်နှင့် ပျူများသည် မြိုင်နယ်မြောက်ပိုင်း၌ပင်ရှိသည့် အိုးဘိုရွာနှင့် ကန်နက်ရွာကို မီးရှို့ဖျက်ဆီးသွားခဲ့ခြင်းဖြစ်ကြောင်း We Love Myaing အဖွဲ့က ပြောသည်။
ထိုသို့ မီးရှို့ဖျက်ဆီးမှုကြောင့် ကန်နက်ရွာရှိ နေအိမ် နှစ်လုံး၊ အိုးဘိုရွာရှိ နေအ်ိမ် ၁၄လုံး စုစုပေါင်း ၁၆လုံး ပျက်စီးဆုံးရှုံးခဲ့ရကြောင်း ဒေသခံများက ပြောသည်။
အိုးဘိုရွာနှင့် ကန်နက်ရွာသည် ယခင်ကလည်းအကြမ်းဖက်စစ်အုပ်စု၏ မီးရှို့ဖျက်ဆီးခြင်း ခံခဲ့ရပြီး ယခုအခါ ဒုတိယအကြိမ်မြောက် ထပ်မံမီးရှို့ခံရခြင်းဖြစ်ကြောင်း We Love Myaing အဖွဲ့က ပြောသည်။
Public Service Announcement
“အိုးဘိုရွာက ကန်နီပျူရွာရဲ့ အနောက်ဘက်မှာ ရှိတာပါ။ ကန်နီမှာလည်း အင်အားတစ်ရာလောက် တိုးချထားတယ်။ အိုးဘိုကျေးရွာကိုရွာအရှေ့တောင်ပိုင်းကနေဝင်ပြီး ရွာအနောက်ပိုင်းကစ မီးရှို့သွားတာ။ ဒေသခံတွေလည်း ဘေးလွတ်ရာသို့ တိမ်းရှောင်နေရတယ်။” ဟု ဒေသခံတစ်ဦးက ပြောသည်။
ပြီးခဲ့သည့် စက်တင်ဘာ ၁ ရက်နှင့် ၂ရက်များက မြိုင်မြို့နယ်မြောက်ပိုင်း ကန်နီ(ပျူ)ရွာရှိ စစ်ကောင်စီတပ်နှင့်ပျူများအား ဒေသတွင်းမဟာမိတ်အဖွဲ့များက နှစ်ရက်ဆက်တိုက် တိုက်ခိုက်ခဲ့ရာ ထိခိုက်သေဆုံးမှုများ ရှိခဲ့သည်။
