ရုရှား ဒုံးကျည်ကြောင့် ယူကရိန်းရဲ့ မြို့တော် ကိယက်ဗ်မှာရှိတဲ့ Patriot လေကြောင်း ကာကွယ်ရေးစနစ် ထိခိုက် ပျက်စီးမှု အခြေအနေတွေ အမေရိကန်က ဆန်းစစ်နေကြောင်း သိရပါတယ်။
မေလ ၁၆ ရက်မှာ ရုရှားဟာ ကိယက်ဗ်ကို ဒုံးကျည်တွေ တပြုံတမကြီး ပစ်လွှတ်ပြီး ညလုံးပေါက် ပစ်ခတ် တိုက်ခိုက်ခဲ့သလို ရုရှား သမ္မတ ဗလာဒီမာ ပူတင် ဂုဏ်ယူကြွားဝါထားတဲ့ Kinzhal အမျိုးအစား ဒုံးကျည်တွေကိုပါ အဲဒီ တိုက်ခိုက်မှုတွေမှာ အသုံးပြုခဲ့ကြောင်း ယူကရိန်းက ဆိုပါတယ်။ ပြီးတော့ အမေရိကန်က ထောက်ပံ့ပေးထားတဲ့ Patriot လေကြောင်း ကာကွယ်ရေး စနစ်ဟာ Kinzhal ဒုံးကျည် ၆ စင်းထက် မနည်းကို ကြားဖြတ် ပစ်ချနိုင်ခဲ့တယ်လို့လည်း ယူကရိန်းက ကြေညာပါတယ်။ Kinzhalတွေဟာ ကမ္ဘာပေါ်မှာ ရှိသမျှ ဘယ်လေကြောင်း ကာကွယ်ရေး စနစ်ကမှ တားဆီးလို့ မရအောင် အသံလွန် ဟိုက်ပါဆောနစ် မြန်နှုန်းနဲ့ ပျံသန်းနိုင်ကြောင်း ပူတင်က ကြွေးကြော်ထားပါတယ်။
ရုရှားက သူတို့ရဲ့ Kinzhal ဒုံးကျည်တွေ ယူကရိန်းမှာ အများအပြား ပစ်ချခံရတယ် ဆိုတာကို ငြင်းဆိုထားပြီး လက်တွေ့မှာတော့ Kinzhal တစ်စင်းက ယူကရိန်း လက်ထဲမှာရှိတဲ့ Patriot လေကြောင်း ကာကွယ်ရေး စနစ်ကိုတောင် ဖောက်ခွဲ ဖျက်ဆီးပစ်နိုင်ခဲ့တယ်လို့ ထုတ်ပြန်ပါတယ်။
ထုတ်လုပ်မှု သက်တမ်း နှစ်ပေါင်း ၄၀ လောက် ကြာမြင့်လာပြီ ဖြစ်တဲ့တိုင် Patriotတွေဟာ လက်ရှိ အချိန်ထိ ကမ္ဘာပေါ်မှာ အစွမ်းထက်ဆုံး လေကြောင်းကာကွယ်ရေး စနစ်တစ်ခုအဖြစ် ရပ်တည်နေဆဲပါ။ အမေရိကန်ဟာ ကိယက်ဗ်ရဲ့ ကောင်းကင်ကို ကာကွယ်ဖို့အတွက် ဒေါ်လာ ဘီလီယံနဲ့ချီ တန်ဖိုးရှိတဲ့ အဲဒီစနစ် တစ်ခုကို ထောက်ပံ့ ပေးပို့ထားတာ ဖြစ်ပါတယ်။
Public Service Announcement
မေလ ၁၆ ရက်က ရုရှားဒုံးကျည် တစ်စီးဟာ ကိယက်ဗ်မြို့ တစ်နေရာမှာ ရှိနေတဲ့ Patriot ဒုံးခွင်းဒုံး စနစ်ကို ထိခိုက် ပျက်စီးစေခဲ့ကြောင်း အမေရိကန်နဲ့ ယူကရိန်း အာဏာပိုင်တွေက အတည်ပြုထားပါတယ်။ ဒါပေမဲ့ လုံးဝဥဿုံ သုံးမရတဲ့ အဆင့်ထိ ပျက်စီးတာမျိုးတော့ မဟုတ်ဘဲ Patriot စနစ်က အလုပ်လုပ်နေဆဲလို့ ကနဦး သိရှိထားကြောင်း အမေရိကန် အမျိုးသား လုံခြုံရေးကောင်စီက မှတ်ချက် ပေးပါတယ်။
ယူကရိန်း လေတပ်ကတော့ ရုရှားရဲ့ ဟိုက်ပါဆောနစ် ဒုံးကျည်တွေကို ပစ်ချခဲ့တယ် ဆိုတာကိုသာ အတည်ပြုပြီး Patriot ဒုံးခွင်းဒုံးစနစ် ဖျက်ဆီးခံရကြောင်း ရုရှားရဲ့ အဆိုနဲ့ ပတ်သက်ပြီး မှတ်ချက်ပေးဖို့ကိုတော့ ငြင်းဆန်သွားပါတယ်။ လောလောဆယ်တော့ အမေရိကန်ဟာ Patriot စနစ်ရဲ့ ပျက်စီးမှု အတိုင်းအတာ ပမာဏကို တိတိကျကျ ဆန်းစစ်ဖို့ ကြိုးစားနေဆဲလို့ သိရပါတယ်။
ရုရှား ကာကွယ်ရေး ဝန်ကြီးဌာနကတော့ တိကျပြီး ထက်မြက်လှတဲ့ Kinzhal ဒုံးကျည်ရဲ့ ဒဏ်ကြောင့် Patriot လေကြောင်းကာကွယ်ရေးစနစ် ပျက်စီးသွားတာ ဖြစ်တယ်လို့ အမွှန်းတင်ပြီး ထုတ်ပြန်ထားပါတယ်။
