စစ်ကောင်စီအဖွဲ့ထံ ခံဝန်ထိုးပါက အိမ်တွင်ပြန်နေ၍ အလုပ်လုပ်နိုင်မည်ဆိုသော်လည်း အရေးတော်ပုံအောင်မှသာ အိမ်ပြန်မည်ဟု ရုပ်ရှင်သရုပ်ဆောင်ပိုင်ဖြိုးသုက ဇွန် ၂၃ ရက်တွင် ၎င်း၏ဖေ့စ်ဘွတ်ခ်၌ ရေးသားထားသည်။
“ခံစားချက်ကိုဦးစားပေးခဲ့မိလို့မှားသွားပါတယ်… လို့ခံဝန်လေးထိုးပြီး အိမ်မှာအေးဆေးပြန်နေရမယ်တဲ့လား…မိသားစုနဲ့ပြန်တွေ့ရမယ်တဲ့လား… အလုပ်တွေပြန်လုပ်ရမယ်တဲ့လား… တချို့တွေအသက်တွေပေးသွားကြပြီ… တချိူ့တွေ ထောင်ထဲရောက်ကုန်ကြပြီ… တချိူ့တွေအားလုံးကိုပစ်ချထားခဲ့ပြီးလက်နက်တွေကိုင်နေကြရပြီ…သူတို့တွေအိမ်ပြန်လို့မရကြတော့ဘူး… မိသားစုနဲ့လည်းကွဲကွာကုန်ကြပြီ… သူတို့ချစ်တဲ့အလုပ်တွေလည်းလုပ်ခွင့်မရကြတော့ဘူး… အဲဒီ့လူတွေကိုငါရှက်တယ်… အဖြစ်မရှိသူဆိုတဲ့ဂုဏ်ပုဒ်နဲ့တင်ငါ့အတွက်လုံလောက်ပါပြီ… သစ္စာဖောက်ဆိုတဲ့တံဆိပ်တော့အကပ်မခံပါရစေနဲ့… အရေးတော်ပုံမအောင်မချင်းငါအိမ်မပြန်ဘူး” ဟု ပိုင်ဖြိုးသုက ရေးသားထားသည်။
ပိုင်ဖြိုးသုသည် အာဏာသိမ်းခံရသည့် အချိန်ကတည်းက အာဏာရှင်ဆန့်ကျင်ရေးလှုပ်ရှားမှုများတွင် ရှေ့တန်းမှပါဝင်ခဲ့ပြီး စစ်ကောင်စီက ပုဒ်မ ၅၀၅(က) ဖြင့် အမှုဖွင့်ခဲ့သောကြောင့် တိမ်းရှောင်နေရသည်။
