ကရင်အမျိုးသားအစည်းအရုံး(KNU/KNLA) တပ်မဟာ (၁)နယ်မြေ ဘားအံမြို့နယ်တွင် အကြမ်းဖက်စစ်အုပ်စုလက်အောက်ခံတပ်များနှင့် တိုက်ပွဲဖြစ်ပွား၍ စစ်အုပ်စုဘက်မှ လေးဦးသေ၊ ငါးဦးဒဏ်ရာရရှိခဲ့သည်ဟု တပ်မဟာ (၁)က ယနေ့သတင်းထုတ်ပြန်သည်။
KNU သထုံခရိုင်၊ ဘားအံမြို့နယ်၊ မီးပုံးကျေရွာအနီး တွင် စစ်အုပ်စု လက်အောက်ခံ အဖွဲ့နှင့် KNLA တပ်ရင်း (၁) လက်အောက်ခံ တပ်ခွဲ(၂)တို့ သြဂုတ်၁ ရက် ညပိုင်းက တိုက်ပွဲဖြစ်ပွားခဲ့ခြင်းဖြစ်သည်ဟုဆိုသည်။
“သူတို့က တပ်တွေလာစွဲထားတော့ လှုပ်ရှားမှုတွေ ပြုလုပ်နေတယ်။ လှုပ်ရှားမှုပြုလုပ်တော့ ကျွန်တော်တို့ သွားလာနေတာနဲ့ ထိပ်တိုက်ပစ်ခတ်မှုတွေဖြစ်ခဲ့တာ” ဟု တပ်မဟာ(၁) တာဝန်ရှိသူတစ်ဦးက ပြောသည်။ တိုက်ပွဲတွင် တပ်မဟာ(၁)ဘက်က ထိခိုက်ကျဆုံးမှုမရှိဟုဆိုသည်။
ဇူလိုင်အတွင်းလည်း KNU တပ်မဟာ(၁)နယ်မြေတွင် တိုက်ပွဲဖြစ်ပွားမှုများ ရှိခဲ့ကြောင်း၊ စစ်ကောင်စီဘက်က ကျေးရွာများအတွင်းသို့ လက်နက်ကြီးဖြင့် ပစ်ခတ်ခဲ့၍ ဒေသခံအချို့ ဒဏ်ရာရရှိခဲ့ပြီး နေအိမ်ပျက်စီးမှုများလည်းရှိခဲ့ကြောင်း ၎င်းက ပြောသည်။
Public Service Announcement
စစ်တပ်အာဏာသိမ်းပြီးနောက်ပိုင်းတွင် KNU တပ်မဟာ(၅)၊တပ်မဟာ(၁)၊ တပ်မဟာ(၃) နယ်မြေများ၌ စစ်ကောင်စီတပ်နှင့် တိုက်ပွဲဖြစ်ပွားမှုများရှိခဲ့သည်။ တပ်မဟာ(၅)နယ်မြေတွင် တိုက်ပွဲဖြစ်ပွားမှု အများဆုံးဖြစ်ပြီး စစ်ကောင်စီတပ်များ အထိနာကာ သေဆုံးဒဏ်ရာရသူများပြားခဲ့သည်။
