အမျိုးသမီးတွေအပေါ် မြန်မာစစ်တပ်က ကျူးလွန်နေသော ဆိုးရွားတဲ့ပြစ်မှုတွေကို နိုင်ငံတကာအသိုင်းအဝိုင်းနဲ့ကုလသမဂ္ဂက ထိရောက်စွာအရေးယူပေးဖို့ ကုလသမဂ္ဂဆိုင်ရာ မြန်မာသံအမတ်ကြီးဦးကျော်မိုးထွန်းက တောင်းဆိုလိုက်ပါတယ်။
မနေ့ကကျင်းပခဲ့တဲ့ (၇၆) ကြိမ်မြောက်ကုလသမဂ္ဂ အထွေထွေညီလာခံ၊ တတိယကော်မတီရဲ့ အမျိုးသမီးများ အခွင့်အရေး မြှင့်တင်ခြင်းဆိုင်ရာ အစည်းအဝေးကို မြန်မာသံအမတ်ကြီး ဦး ကျော်မိုးထွန်းတက်ရောက်ကာ တောင်းဆိုလိုက်တာ ဖြစ်ပါတယ်။
မြန်မာနိုင်ငံမှာ ကုလသမဂ္ဂမှတ်တမ်းတွေအရ လိင်ပိုင်းဆိုင်ရာ အကြမ်းဖက်မှုဟာ စစ်တပ်ရဲ့ ဝိသေသလက္ခဏာဖြစ်ပြီး ဖေဖော်ဝါရီ ၁ရက် အာဏာသိမ်းမှုနောက်ပိုင်း မြန်မာအမျိုးသမီးတွေဟာ စစ်တပ်ရဲ့ အကြမ်းဖက်မှုမျိုးစုံအန္တရာယ်နဲ့ရင်ဆိုင်နေရတယ်လို့ မြန်မာသံအမတ် ကြီးက ပြောပါတယ်။
သံအမတ်ကြီး ဦးကျော်မိုးထွန်းရဲ့ မိန့်ခွန်းမှာ အမျိုးသမီးတွေအပေါ် ခွဲခြားဆက်ဆံမှု အားလုံး ရပ်တန့်ရေးဟာ အခြေခံလူ့အခွင့်အရေးကိစ္စရပ်သာမဟုတ်ဘဲ နိုင်ငံအား လုံးအတွက် ရေရှည်ဖွံ့ဖြိုးတိုးတက်သော အနာဂတ် တည်ဆောက်ရေးအတွက်အရေးကြီးတဲ့ ကိစ္စဖြစ် ကြောင်း ထည့်သွင်း ပြောပါတယ်။
ဆက်လက်ပြီး အမျိုးသမီးတွေအပေါ် ခွဲခြားဆက်ဆံ ခြင်းနဲ့ အကြမ်းဖက်မှုတွေအတွက် နိုင်ငံတကာအသိုင်း အဝိုင်းနဲ့ကုလသမဂ္ဂရဲ့ ကာကွယ်တားဆီးရေး အစီအစဉ်တွေကိုလည်း မြန်မာသံအမတ်ကြီးက မေးမြန်းခဲ့ပါတယ်။