မင်းတပ်မြို့နယ်အတွင်းရှိ သစ်တောထွက်ပစ္စည်းများနှင့်သဘာဝပေါက်ပင်များကို တရားမဝင် ရောင်းဝယ်ဖောက် ကားပါက ပြင်းထန်စွာအရေးယူမည်ဟု မင်းတပ်မြို့နယ် ပြည်သူ့အုပ်ချုပ်ရေးအဖွဲ့နှင့် CDF-Mindat က ယနေ့(အောက်တိုဘာ၁၉) သတိပေးချက်ထုတ်ပြန်သည်။
မင်းတပ်မြို့နယ်အတွင်းရှိ သဘာဝပေါက်ပင်များဖြစ်သည့် သစ်ခွ၊ ပုဇွန်၊ နီလုံး ၊ဖြူတု၊ ရိုးတန်ရှည် ၊တစ်လုံးဥ၊ တပင်တိုင်မြနန်း ၊တောင်လုံးကျော် စသည့် သစ်တောထွက်ပစ္စည်းများကို ရှာဖွေခြင်း၊ ရောင်းဝယ်ဖောက်ကားခြင်းများနှင့် တရားမဝင် သစ်ခိုးထုတ်ခြင်းများ ပြုလုပ်ပါက ပြင်းထန်စွာ အရေးယူသွားမည်ဟု သတိပေးချက်ထုတ်ပြန်ခြင်းဖြစ်သည်။
မင်းတပ်မြို့နယ် ပြည်သူ့အုပ်ချုပ်ရေးအဖွဲ့သည်မကြာသေးမီကလည်း အဓိကထွက်ကုန်ဖြစ်သော ဝဥများ ခိုးယူရောင်းချခြင်းမပြုရန် သတိပေးချက်ထုတ်ပြန်ထားသည်။
ယင်းကဲ့သို့ ထုတ်ပြန်ချက်ကို ကြိုဆိုကြောင်း ဒေသခံများက မှတ်ချက်ပြုကြသည်။
ချင်းပြည်နယ် မင်းတပ်မြို့သည် စစ်ကောင်စီအား အစောဆုံးလက်နက်စွဲကိုင်တော်လှန်ခဲ့သည့် မြို့နယ် ဖြစ်ပြီး ယခုအခါ ဒေသတွင်း အုပ်ချုပ်ရေး၊ တရားဥပဒေစိုးမိုးရေးတို့ကို မင်းတပ်မြို့နယ် ပြည်သူ့အုပ်ချုပ်ရေးအဖွဲ့နှင့် CDF-Mindat က ပူးတွဲအကောင်အထည်ဖော်နေနိုင်ပြီ ဖြစ်သည်။