ဖာပွန်ခရိုင်ထဲမှာ စစ်ကောင်စီတပ်ဖွဲ့တွေဟာ စစ်ရေးလှုပ်ရှားမှုတွေ တိုးမြှင့်လုပ်ဆောင်လာနဲ့အမျှ အမျိုးသမီးတွေကို အဓမ္မခိုင်းစေတာတွေ ပိုလုပ်လာခဲ့ပြီး အဓမ္မလုပ်အားပေး စေခိုင်းခံရတဲ့အခါမှာ စစ်ကောင်စီတပ်သားတွေရဲ့ ကိုယ်ထိလက်ရောက် အကြမ်းဖက်မှုကို ခံရလေ့ရှိတယ်လို့ ကရင်အရပ်ဘက်အဖွဲ့အစည်းတွေကပြောပါတယ်။
ဖာပွန်ခရိုင်အတွင်း စစ်ရေးဝင်ရောက်လှုပ်ရှားနေတဲ့ စစ်ကောင်စီတပ်တွေဟာ အာဏာသိမ်းပြီးတဲ့နောက်ပိုင်း ဒေသခံအမျိုးသမီးတွေအပေါ် အကြမ်းဖက်တာ၊ ဖမ်းဆီးခေါ်ဆောင်တာ၊ လူသားဒိုင်းကာအဖြစ်အသုံးပြုတာနဲ့ အထမ်းသမားပေါ်တာအဖြစ် ခိုင်းစေတာတွေ ပိုလုပ်ဆောင်လာခဲ့တယ်လို့ ကရင်အမျိုးသမီးအစည်းအရုံး (KWO)က ပြောခွင့်ရသူက ဆိုပါတယ်။
“ခုက သူတို့(စစ်ကောင်စီ)ပစ်မှတ်ထားတာက အမျိုးသားကိုမတွေ့လို့ရှိရင် များသောအားဖြင့် အမျိုးသမီးကိုခေါ်တယ်။ အမျိုးသမီးကို ဓားစာခံအဖြစ် လမ်းပြခိုင်းတာတို့ လမ်းပြမသွားလို့ရှိရင် ထုတာရိုက်နှက်တာတို့ ပြီးတော့ သူတို့ရဲ့လေးလံတဲ့ ပစ္စည်းကိုသယ်ခိုင်းတာတော့ အခုကတော့အခြေအနေမှာ အများကြီးဖြစ်ပေါ်တာရှိတာပေါ့နော်။ ဒေသခံအမျိုးသမီးတွေက ဘယ်လိုပဲဖြစ်ဖြစ် သွားရေးလာရေးမှာ ဆင်ဆင်ခြင်ခြင်နဲ့သွားဖို့။ ဘယ်လိုပဲဖြစ်ဖြစ်ပေ့ါနော်။ ကိုယ့်ကို စစ်ကောင်စီက တခုခုလုပ်မယ်ဆိုလို့ရှိရင် သတင်းအချက်အလက်တို့ နေရာဒေသသေသေချာချာ မှတ်ထားဖို့ ပြောချင်ပါတယ်” လို့ ကရင်အမျိုးသမီးအစည်းအရုံး (KWO) က ပြောခွင့်ရသူကဆိုပါတယ်။
ကရင်ငြိမ်းချမ်းရေးကွန်ယက် အထောက်အကူပြုကွန်ယက် KPSN က ထုတ်ပြန်ထားတဲ့ အစီရင်ခံစာမှာလည်း ဖာပွန်ခရိုင်ထဲ စစ်ရေးဝင်ရောက်ကျူးကျော်လှုပ်ရှားနေတဲ့ စစ်ကောင်စီတပ်ဖွဲ့တွေဟာ ကေအဲန်ယူရဲ့ ပြောက်ကျားတိုက်ခိုက်မှုတွေကြောင့် အကျအဆုံးများပြားခဲ့ပြီး ဒါကို လက်တုံ့ပြန်တဲ့အနေနဲ့ စစ်ကောင်စီဟာ ဒေသခံအရပ်သားတွေအပေါ် ပစ်မှတ်ထားတိုက်ခိုက်မှုတွေ ပိုမိုလုပ်ဆောင်လာခဲ့တယ်လို့ ဖော်ပြထားပါတယ်။
Public Service Announcement
စစ်ကောင်စီတပ်ဖွဲ့တွေဟာ ကေအဲန်ယူအပေါ် တိုက်ရိုက်လက်စားခြေနိုင်ခြင်းမရှိတဲ့အတွက် အရပ်သားတွေကိုပစ်မှတ်ထားပြီး အမျိုးသားတွေကို သာမက အမျိုးသမီးတွေကိုပါ ဥပဒေမဲ့ဖမ်းဆီးတာ၊ ညဉ်းပန်းနှိပ်စက်တာ၊ အထမ်းသမား ပေါ်တာအဖြစ်ခိုင်းစေတာနဲ့ လူသားဒိုင်းကာအဖြစ် အသုံးပြုတာတွေကို လုပ်ဆောင်ခဲ့တယ်လို့ အစီရင်ခံစာမှာ ဖော်ပြထားပါတယ်။
လက်ရှိဖာပွန်ခရိုင်ထဲမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA တပ်တို့အကြား စစ်ရေးပဋိပက္ခတွေ ဆက်လက်ဖြစ်ပွားနေပြီး စစ်ဘေးဒဏ်ကြောင့် စစ်ရှောင်ဦးရေ ၈၂၀၀၀ ကျော် တိမ်းရှောင်ထွက်ပြေးနေရတာဖြစ်ပြီး အကူအညီတွေ လိုအပ်နေတယ်လို့ ကရင်အမျိုးသမီးအစည်းအရုံး KWO ထံကနေ သိရပါတယ်။
