နိုင်ငံမတည်မငြိမ်ဖြစ်အောင်လှုံဆော်တယ်ဆိုပြီး ရန်ကုန်တက္ကသိုလ်ကျောင်းသားများသမဂ္ဂ ဗဟိုအလုပ်အမှုဆောင် ကိုအောင်ဖုန်းမော်ကို ရာဇသတ်ကြီးပုဒ်မ ၅၀၅ (က) နဲ့ ဒီနေ့မှာ အလုပ်ကြမ်း ထောင်ဒဏ် ၃ နှစ် ချလိုက်ပါတယ်။
ဒီလို ကိုအောင်ဖုန်းမော်ကို ထောင်ချလိုက်တာကိုရန်ကုန်တက္ကသိုလ်ကျောင်းသားသမဂ္ဂကလည်းအသိပေးထုတ်ပြန်ထားတာတွေ့ရပါတယ်။
ကိုအောင်ဖုန်းမော်ဟာ ပြီးခဲ့တဲ့မတ်လအတွင်းက ရန်ကုန်၊တာမွေမှာ စစ်အာဏာရှင်ဆန့်ကျင်ရေးငြိမ်းချမ်းစွာဆန္ဒပြချိန်မှာ တခြားသောကျောင်းသားခေါင်းဆောင်တွေနဲ့အတူ အဖမ်းဆီးခံခဲ့ရတာပါ။
ဖမ်းဆီးခံရပြီးနောက် စစ်ကြောရေးကို ဖြတ်သန်းခဲ့ရသလို အင်းစိန်ထောင်ကိုရောက်ချိန်မှာလည်း နိုင်ငံရေးအကျဉ်းသားမဟုတ်သူတွေနဲ့ ရောနှောထားတာမျိုးလုပ်ခဲ့ပြီးအလုပ်ကြမ်းစေခိုင်းတာလည်း ရှိခဲ့တယ်လို့ ပြီးခဲ့တဲ့ ဇူလိုင်လအတွင်းက ရန်ကုန်တက္ကသိုလ်ကျောင်းသမဂ္ဂက ထုတ်ပြန်ထားခဲ့ဖူးပါတယ်။
Public Service Announcement
ဒီနေ့ထောင်ချခံရတဲ့ ကိုအောင်ဖုန်းမော်ဟာ ရန်ကုန်တက္ကသိုလ်ရဲ့ နောက်ဆုံးနှစ် သင်္ချာကျောင်းသားတစ်ဦးဖြစ်ပြီး ရန်ကုန်တက္ကသိုလ် ကျောင်းသားများသမဂ္ဂရဲ့ သုတေသနရေးရာတာဝန်ခံ လည်းဖြစ်ပါတယ်။
စစ်ကောင်စီဟာ စစ်အာဏာသိမ်းတာကို ဆန့်ကျင်တဲ့သူမှန်သမျှကို ပြင်းပြင်းထန်ထန်နှိပ်ကွပ်နေသလိုအကြမ်းဖက် သတ်ဖြတ်တာတွေကိုလည်းလုပ်ဆောင်နေပါတယ်။
