ကနီမြို့မှ စျေးဝယ်ပြန်လာသည့် စစ်ကောင်စီတပ်နှင့် ပျူစောထီးအဖွဲ့ကို စောင့်ကြိုတိုက်ခိုက်ခဲ့ရာ ထိခိုက်သေဆုံးမှုအချို့ရှိသည်ဟု KLG PDF က ထုတ်ပြန်သည်။
ယနေ့(မတ်လ ၂၅ ရက်) နံနက် ၁၀နာရီခွဲခန့်တွင် အင်အား ၂၀ကျော်ပါသည့် စစ်အုပ်စုကို လက်လုပ်လက်နက်ကြီးများဖြင့် အဓိကထားတိုက်ခိုက်ခဲ့ခြင်းဟု KLG PDF တာဝန်ရှိသူက ဆိုသည်။
“ကနီ မြို့ပေါ်က နေ ခြေလျင်ဆင်းလာတာ။ရေ လည်ကျွန်းမှာက အင်အား ၁၅၀ ဝန်းကျင်ရှိတဲ့ တပ်အထိုင်ရှိတယ်။ကျွန်တော်တို့ လည်း သူတို့ အဖွဲ့တွေ မြို့ပေါ်တက်တယ်ဆိုတာ သတင်းရတာနဲ့ သွားစောင့် တိုက်တာ။အထိအခိုက်က ရှိတယ်။ဘယ်နှယောက်မှန်းမသိသေးလို့ အတည်မပြုသေးတာ”ဟု ၎င်းက ပြောသည်။
ယနေ့ ကြားဖြတ်တိုက်ခိုက်မှုကို မိနစ်ပိုင်းအတွင်း အလျင်အမြန် ဆောင်ရွက်၍ တပ်ဆုတ်ခဲ့ပြီး ရဲဘော်များ ထိခိုက်မှုတစ်စုံတစ်ရာ မရရှိခဲ့ဟုလည်း သိရသည်။
Public Service Announcement
“ကနီမြို့ပေါ်နဲ့ ရေလည်ကျွန်းရွာ က ဆိုင်ကယ်နဲ့ ဆိုရင်တောင် ၁၅ မိနစ် လောက်နဲ့ရောက်နိုင်တယ်။စခ တပ်ကူတွေလည်း အလျင်အမြန် ရောက်နိုင်တာကို။ဒါကြောင့် စစ်ဆင်ရေးကို အောင်အောင်မြင်မြင်နဲ့ အပြီးသတ်နိုင်ခဲ့တယ်လို့ ပြောရမယ်”ဟု အထက်ပါတာဝန်ရှိသူက ရှင်းပြသည်။
မတ်လ ၂၃ ရက် နှင့် ၂၄ ရက်တို့တွင် မင်းကင်းမြို့နယ်၊တောင်တွင်းချောင်ဒေသ၊ ကျော်ရွာ တွင် တပ်စွဲထားသော စစ်ကောင်စီတပ်ကို KLG PDF အပါအဝင် ပြည်သူ့ကာကွယ်ရေးတပ်များ ပူးပေါင်းတိုက်ခိုက်မှုရှိခဲ့ထားသည်။
ထိုဖြစ်စဥ်များတွင် စစ်ကောင်စီတပ်သား ၁၀ ဦးထက်မနည်းသေဆုံးမှုရှိခဲ့ကြောင်းလည်း ပြည်သူ့တပ်ဖွဲ့များက ထုတ်ပြန်ထားသည်။
