အင်းစိန်ဗဟိုအကျဥ်းထောင်ရှိ ဖမ်းဆီးခံနိုင်ငံရေးအကျဥ်းသားများနှင့် ကျောင်းသားများအနက် အချို့ကို ထောင်ပြောင်းရွှေ့မှုများ ပြုလုပ်နေကြောင်း မတရားဖမ်းဆီးခံရသူများ၏ ကိုယ်စားလှယ်ရှေ့နေ့များက People’s Springသို့ ပြောသည်။
ယမန်နေ့(ဧပြီ ၂၄ ရက်)ကစ၍ မွန်ပြည်နယ်ကျိုက်မရောထောင်နှင့် ပဲခူးတိုင်း ဒိုက်ဦးအကျဥ်းထောင်သို့ အမျိုးသား ၁၂၀ နှင့် အမျိုးသမီး ၄၀ ခန့်ပါဝင်သည်ဟု ဆိုသည်။
“စစ်တပ်ကို ဆန့်ကျင်လို့ကျသွားတဲ့ ဒါမှမဟုတ် အမှုရင်ဆိုင်နေရတဲ့ သူတွေကို ခေတ်အဆက်ဆက် ပြောင်းရွှေ့မှု တွေရှိခဲ့တယ်။အခုလည်း သူတို့ လုပ်နေတယ်။ဒါတောင် နယ်မြေ မတည်ငြိမ်သေးလို့ အနည်း ငယ်ပဲသူတို့ ရွှေ့နိုင်သေးတာ”ဟု ဖမ်းဆီးခံနိုင်ငံရေးအကျဥ်းသားများ၏ အမှုများကို လိုက်ပါဆောင်ရွက်နေသည့် တရားလွှတ်တော် ရှေ့နေတစ်ဦးက ရှင်းပြသည်။
အလားတူ အင်းစိန်ထောင်အတွင်းရှိ သီးသန့်ဆောင်မှ နိုင်ငံရေးအကျဥ်းသားများကိုလည်း ထောင်မကြီး အတွင်းသို့ ပြောင်းရွှေ့မှုများလည်း လုပ်ဆောင်နေသည်ဟု ၎င်းက ပြောသည်။
Public Service Announcement
လက်တလော ထောင်ပြောင်းရွှေ့ခံရသူများထဲတွင် ဖမ်းဆီးခံထားရသော ဒဂုံတက္ကသိုလ်ကျောင်းသားများသမဂ္ဂအမှုဆောင်များလည်း ပါဝင်နေသည်ဟုလည်း ဒဂုံတက္ကသိုလ်ကျောင်းသားများသမဂ္ဂက ယနေ့(ဧပြီ ၂၅ ရက်)တွင် ထုတ်ပြန် အသိပေးသည်။
ရန်ကုန်မြို့ရှိ အင်းစိန်ဗဟိုအကျဥ်းထောင်တွင်း၌ပင် နိုင်ငံရေးအကျဥ်းသားများနှင့် ကျောင်းသားများကို
ကိုယ်ထိလက်ရောက် ဖိနှိပ်မှုများစွာရှိနေကြောင်း ပြန်လည်လွတ် မြောက်လာသူများက ထုတ်ဖော်ပြောကြားထားသည်။
အကြမ်းဖက်စစ်အုပ်စုက အာဏာသိမ်းပြီးနောက်ပိုင်း တွင် ၎င်းတို့အား ဆန့်ကျင်မှုဖြင့် ဖမ်းဆီးခံရသူ ၁၃,၃၃၄ ဦး နှင့် သတ်ဖြတ်ခံရသူ ၁,၇၈၂ ဦးရှိကြောင်း နိုင်ငံရေးအကျဥ်းသားများကူညီစောင့်ရှောက်ရေးအသင်း AAPP က ဆိုသည်။
