ဒီနေ့မေလ ၃ ရက်နေ့ဟာ ကမ္ဘာ့စာနယ်ဇင်းလွတ်လပ်ခွင့်နေ့ဖြစ်ပါတယ်။
စစ်တပ်အာဏာသိမ်းထားတဲ့ မြန်မာနိုင်ငံရဲ့သတင်းမီဒီယာ လွတ်လပ်ခွင့်ကတော့ ဆယ်စုနှစ်တစ်ခုစာ နောက်ပြန်သွားတယ်လို့ သတင်းမီဒီယာလွတ်လပ်ခွင့်စောင့်ကြည့်မှတ်တမ်းတင်တဲ့အဖွဲ့တွေက ထုတ်ပြန်ကြပါတယ်။
ပြင်သစ်အခြေစိုက် နယ်စည်းမခြားသတင်းထောက်များအဖွဲ့ (Reporters Without Borders −RSF)ရဲ့ ၂၀၂၁ ခုနှစ် စာရင်းတွေအရ မြန်မာနိုင်ငံရဲ့ သတင်းမီဒီယာ လွတ်လပ်ခွင့် ညွှန်းကိန်းဟာ နိုင်ငံပေါင်း ၁၈၀အနက် ကမ္ဘာ့အဆင့် ၁၄၀ အထိလျောကျသွားတာတွေ့ရပါတယ်။
စစ်အာဏာသိမ်းပြီးနောက် သတင်းမီဒီယာတိုက်တွေကိုပိတ်ပစ်တာ ၊သတင်းမီဒီယာသမားတွေကို ဖမ်းဆီးတာတွေကို စစ်အုပ်စုက ဆက်တိုက်လုပ်ခဲ့ပါတယ်။
အာဏာသိမ်းတဲ့ရက်ကစပြီး နိုင်ငံတလွှား သတင်းမီဒီယာသမား ၁၁၅ ဦး ဖမ်းဆီးခံခဲ့တယ်လို့ RSF ကဆိုထားပါတယ်။
ဖမ်းမိထားတဲ့သူတွေထဲမှာအချို့ကို ပြန်လွှတ်ပေးခဲ့ပေမယ့် ၁၄ ဦး ထောင်ချခံထားရပြီး လက်ရှိအချိန်ထိ ၅၇ ဦးဟာ မတရားဖမ်းဆီးတရားစွဲခံထားရတယ်လို့ RSF ရဲ့အချက်အလက်အရသိရပါတယ်။
ဒီလိုဆက်လက်ဖမ်းဆီးတရားစွဲခံထားရသူတွေထဲမှာ အမျိုးသမီး ၉ ဦးပါဝင်ပါတယ်။ ဒါအပြင် စစ်ကောင်စီတပ်ဖွဲ့ဝင်တွေရဲ့ သတ်ဖြတ်တာခံလိုက်ရတဲ့ သတင်းသမားဟာ ၃ ဦးထိရှိခဲ့ပါတယ်။
စစ်အုပ်စုဟာ သတင်းမီဒီယာတိုက် အချို့ကို ဝင်စီးနင်းခဲ့သလို သတင်းဌာန ၁၂ ခုရဲ့ လိုင်စင်ကိုပိတ်သိမ်းခဲ့ပါတယ်။
စစ်ကောင်စီရဲ့ပြောရေးဆိုခွင့်ရှိသူကတော့ သတင်းမီဒီယာအလုပ်လုပ်ကိုင်တဲ့အတွက် ဖမ်းဆီးတာမျိုးမရှိဘူးလို့ ငြင်းဆိုထားပါတယ်။
အကြမ်းဖက်လို့သတ်မှတ်ထားတဲ့ အဖွဲ့တွေနဲ့ဆက်သွယ်တာ ၊ နိုင်ငံမတည်မငြိမ်ဖြစ်အောင် လှုံဆော်ရေးသားတာတွေကြောင့်သာ ဖမ်းဆီးရတယ်လို့ စစ်ကောင်စီပြောရေးဆိုခွင့်ရှိသူက ပြောပါတယ်။
အာဏာသိမ်းစစ်ကောင်စီဟာ သတင်းမီဒီယာသမားတွေကို ဖမ်းမိရင် နိုင်ငံမတည်မငြိမ်ဖြစ်အောင်လှုံဆော်မှု ၊နိုင်ငံတော်အကြည်ညိုပျက်စေမှု ၊ မတရားအသင်းဆက်သွယ်မှု ၊အီလက်ထရောနစ်ဥပဒေ၊ အကြမ်းဖက်ဥပဒေတွေနဲ့ တရားစွဲတာမျိုးတွေလုပ်နေတာတွေ့ရပါတယ်။
ဓာတ်ပုံ − ရိုက်တာ