ဘီးလင်း-ဖာပွန်ကားလမ်းပေါ်မှာရှိတဲ့ စစ်ကောင်စီရဲ့ မဲပလီစခန်းက နယ်ခြားစောင့်တပ် (BGF) နဲ့ စစ်ကောင်စီတပ်ဖွဲ့ဝင်တွေဟာ ကျေးရွာတွေက အရပ်သားပြည်သူတွေကို အကြောင်းမဲ့ဖမ်းဆီးပြီး ညှဉ်းပန်းနှိပ်စက်နေတယ်လို့ တပ်မဟာ ၁ နယ်မြေအတွင်းက မိတ်ဖက်တော်လှန်ရေးတပ်ပေါင်းစုထံကနေ သိရပါတယ်။
ကေအဲန်ယူ-ဒူးသထူခရိုင် ဘီးလင်းမြို့နယ်က မဲပလီရွာသားသုံးဦးနဲ့ အစူးချောင်းရွာသားတစ်ဦးတို့ဟာ တောင်ယာလုပ်ကိုင်ရာကနေ ပြန်လာတဲ့အချိန်မှာ BGF နဲ့ စစ်ကောင်စီတပ်ဖွဲ့ဝင်တွေက မနေ့ မေလ ၂ ရက်က အကြောင်းမဲ့ရိုက်နှက်ပြီး ညှဉ်းပန်းနှိပ်စက်မှုတွေ ပြုလုပ်ခဲ့ကာ ဖမ်းဆီးခေါ်ဆောင်သွားခဲ့တယ်လို့ သိရပါတယ်။
ဖမ်းဆီးခံရတဲ့ရွာသားတွေဟာ အခုအချိန်ထိ ပြန်လည်လွတ်မြောက်လာခြင်းမရှိသေးဘူးလို့ ဒေသခံဆီကနေ သိရပါတယ်။
“မနေ့က မဲပလီရွာသား သုံးယောက်နဲ့ အစူးချောင်းရွာသား တစ်ယောက်ကို သူတို့(စစ်ကောင်စီ)ဖမ်းသွားတယ်။ အတင်းရိုက်နှက် ထိုးကြိတ်သွားတယ်။ အခုချိန်ထိ ပြန်လွတ်မလာသေးဘူး” လို့ ဒေသခံတစ်ဦးက ပြောပါတယ်။
Public Service Announcement
စစ်ကောင်စီနဲ့ နယ်ခြားစောင့်တပ်ဖွဲ့ဝင်တွေဟာ ကျေးရွာတွေအတွင်းက အပြစ်မဲ့အရပ်သားပြည်သူတွေကို အကြောင်းမဲ့ဖမ်းဆီးနှိပ်စက်ညှဉ်းပန်းမှုတွေ မကြားခဏပြုလုပ်လေ့ရှိပြီး လူ့အခွင့်အရေးချိုးဖောက်တဲ့လုပ်ရပ်တွေကို ပြောင်ပြောင်တင်းတင်း ကျူးလွန်လျက်ရှိနေတယ်လို့ မိတ်ဖက်တော်လှန်ရေးတပ်ပေါင်းစုက ဆိုပါတယ်။
ဒါ့အပြင် စစ်ကောင်စီရဲ့ စစ်ကြောင်းတွေမှာ ဒေသခံအမျိုးသမီးတွေ သက်ကြီးရွယ်အိုတွေကို အဓမ္မဖမ်းဆီးပြီး လူသားဒိုင်းအဖြစ် အသုံးပြုတာတွေလည် လုပ်ဆောင်လျက်ရှိနေတယ်လို့ မိတ်ဖက်တော်လှန်ရေးတပ်ပေါင်းစုရဲ့ ထုတ်ပြန်ထားချက်အရ သိရပါတယ်။
