လူ့အခွင့်အရေးကို နားမလည်ဘဲ အာဏာသိမ်းစစ်ကောင်စီ၏ ခိုင်းစေသမျှကို အောက်ခြေစစ်သားများလိုက်လံဆောင်ရွက်နေရကြောင်း တပ်မ(၉၉) လက်အောက်ခံ တပ်ရင်း – ၄၁၇မှ CDM ပြုလုပ်လာသော တပ်သားဖိုးထောင်က ပြောကြားသည်။
ကိုယ်ပိုက်နံပါတ် တ – ၅၃၈၆၇၅၊မိတ္ထီလာ -ပျော်ဘွယ် အခြေစိုက် တပ်ရင်း – ၄၁၇မှ တပ်သားဖိုထောင်သည် ကရင်နီပြည်သူ့ရင်ခွင်အဖွဲ့သို့ မေလ ၂၄ ရက်က မိသားစု နှင့်အတူ ရောက်ရှိလာခြင်းဖြစ်သည်။
“လူ့အခွင့်အရေးကို ဘာမှမသိသေးဘူး။ဘာမှ နားမလည်ဘူး။ သူတို့ခိုင်းတာ လုပ်နေရတယ်။သူတို့က တိုက်ဆို တိုက်ရတယ်။ သွားဆိုသွားရတယ်။တစ်ခါတစ်လေ တပ်ခွဲမှူးဆိုတဲ့သူတောင် ကိုယ်သွားရမယ့် စစ်ဆင်ရေးနေရာကို မသိဘူး။ တစ်ခုခုဖြစ်လာရင်လည်း ဘာမှလုပ်ပေးတာမဟုတ်ဘူး”ဟု CDMတပ်သားဖိုးထောင်က ရှင်းပြသည်။
ထို့ကြောင့် အာဏာသိမ်းစစ်ကောင်စီတပ်အတွင်း ကျန်ခဲ့သည့် တပ်ဖွဲ့ဝင်များအနေဖြင့် ပြည်သူများကြားသို့ ဝင်ရောက်လာရန်နှင့် လူ့အခွင့်အရေးများကို လေ့လာရန် ၎င်းက တိုက်တွန်းသည်။
Public Service Announcement
“အာဏာမသိမ်းခင် လပိုင်းအလိုကတည်းက ကျွန်တော်တို့ ဖုန်းတွေကို ပိတ်ချပစ်တယ်။နောက်မှ ဒီလိုဒီအကြောင်းဆက်စပ်မိတာ။ အာဏာသိမ်းပြီးတော့လည်း မိသားစုတွေ တပ်တွင်းထဲက ပေးမထွက်ဘူး။နောက်ပြီး အခု ရွာတွေကို မီးရှို့ကလေး၊အဘိုးအဘွားအရွယ်တွေပါ မထားဘဲ သတ်ဖြတ်၊မုဒိမ်းကျင့်နေတာတွေ ကို လုံးဝမကြိုက်ဘူး”ဟု CDM တပ်သားဖိုးထောင်က People’s Springသို့ ပြောသည်။
စစ်ကောင်စီအောက်ခြေစစ်သားများအနေဖြင့် ရွာစဥ်ပတ်မီးရှို့၊သတ်ဖြတ် မုဒိမ်းကျင့်မှုများသည် အထက်မှ ခွင့်ပြုစေခိုင်းခြင်းတို့ကြောင့် လုပ်ဆောင်ရခြင်းဟုလည်း ၎င်းက ဆိုသည်။
အလားတူ လစာငွေ ၁၆၂,၀၀၀ ကျပ်မှာလည်း ဦးပိုင်၊ဘဏ်စုငွေ ၊ တပ်တွင်းသက်သာဆိုင် နှင့် တပ်တွင်း ဓမ္မာရုံ အစရှိသဖြင့် သာရေး၊နာရေးများ ဖြတ်ခံရမှုကြောင့် သုံးသောင်းကျပ်သာပိုလေ့ရှိပြီး လစဥ်အများစုမှာ အကြွေးတင်သည်ဟု အသိပေးသည်။
ထို့အပြင် တပ်တွင်း၌ ကိုယ့်ကိုကိုယ် သတ်သေသည့် ရဲဘော်အချို့အပြင် အာဏာသိမ်းစစ်တပ်ကို စိတ်ပျက်နေသည့် ရဲဘော်များရှိသောကြောင့် ၎င်းတို့အနေဖြင့် ဆက်သွယ်လာကြရန်လည်း CDM တပ်သားဖိုးထောင်က တိုက်တွန်းထားသည်။
လက်ရှိ အာဏာသိမ်းစစ်ကောက်စီတပ်ကို စွန့်ခွာကာ ကရင်နီပြည်သူ့ရင်ခွင်အဖွဲ့ထံ ဆက်သွယ်ခိုလှုံလာသည့် စစ်သားနှင့် ရဲတပ်ဖွဲ့ဝင် ၇၀ဦးခန့်ရှိပြီဖြစ်ကြောင်း သိရသည်။
