ရန်ကုန်မြို့ အမှတ် (၃)လမ်းမကြီးပေါ်ရှိ စစ်အုပ်စုပိုင် မြန်မာဘီယာစက်ရုံကို အဝေးထိန်းဗုံးနှစ်လုံးဖြင့် ဖောက်ခွဲတိုက်ခိုက်ခဲ့ကြောင်း Yangon UG Association(YUA)က ထုတ်ပြန်သည်။
ယမန်နေ့ (စက်တင်ဘာ ၃ ရက်) ည ၉ နာရီ ၃၉ ခန့်တွင် ရန်ကုန်မြို့ အမှတ် (၃)အဝေးပြေးလမ်းမကြီးပေါ်ရှိ စစ်အုပ်စုပိုင် မြန်မာဘီယာစက်ရုံအား YUA အဖွဲ့ဝင် Generation Z Defense Force & Supply Army(GZDF)အဖွဲ့က အဝေးထိန်းဗုံးနှစ်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ဖော်ပြသည်။
“စစ်တုရင်ထိုးသလိုပေါ့ သူရွေ့အလှည့်မို့ ခဏစောင့်နေတာ အခုက ကိုယ်အလှည့်”ဟု Yangon UG Association (YUA)က ဆိုသည်။
အထက်ပါတိုက်ခိုက်မှုအား စစ်အုပ်စုအနေဖြင့် မြို့ပြတွင် လုံးဝအုပ်ချုပ်ခွင့်မရစေရဟူသောရည်ရွယ်ချက်ဖြင့် ဖောက်ခွဲတိုက်ခိုက်ခဲ့ခြင်းဖြစ်ကာ တိုက်ခိုက်မှုအတွင်း ထိခိုက်မှုတစ်စုံတစ်ရာရှိမရှိကို မသိရသေးသော်လည်း ရဲဘော်များဘေးကင်းစွာဆုတ်ခွာလာနိုင်ခဲ့ကြောင်း အသိပေးသည်။
Public Service Announcement
“(ပေါက်ကွဲသံ)ကြားတယ်။ အသံအတော်ကျယ်တယ်”ဟု မြန်မာဘီယာစက်ရုံအနီးဝန်းကျင်၌ နေထိုင်သူတစ်ဦးက မှတ်ချက်ပေးသည်။
ထို့အပြင် အများပြည်သူအနေဖြင့် စစ်ကောင်စီနှင့် ၎င်း၏ထောက်တိုင်များ၊ လုပ်ငန်းဌာနများ၊ အထိုင်ချကင်းနှင့် လှည့်ကင်းများနှင့် ဝေးဝေးမှရှောင်ရှားကြရန် မေတ္တာရပ်ခံအသိပေးထားသည်။
