ဖမ်းဆီးခံနိုင်ငံရေးအကျဥ်းသားများ၏ အိုးဘိုထောင်တွင်းတိုက်ပွဲကို စစ်အုပ်စုက ပုံစံမျိုးစုံဖြင့် ဖိနှိပ်နေ

အကျဥ်းသားများအား ခြေကျင်းခတ်ခြင်း၊ တိုက်ပိုက်ခြင်းများဖြင့် ဖိနှိပ်ထား

ပွင့်လင်းမြင်သာမှုနှင့် တရားမျှတမှုမရှိသော တရားစီရင်ရေးစနစ်ကို ဆန့်ကျင်သောအားဖြင့် မန္တလေးအိုးဘိုထောင်အတွင်း အစာငတ်ခံဆန္ဒဖော်ထုတ်လျှက်ရှိသော နိုင်ငံရေးအကျဥ်းသားများကို စစ်အုပ်စုက ပုံစံမျိုးစုံဖြင့် ထောင်တွင်းဖိနှိပ်မှုများရှိနေကြောင်း ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့က ထုတ်ပြန်သည်။

စစ်အုပ်စု၏ တရားစီရင်ရေးစနစ်ကို ဆန့်ကျင်တိုက်ပွဲဝင်နေသော အိုးဘိုထောင်အတွင်းမှ နိုင်ငံရေးအကျဥ်းသားများ၏ ထောင်တွင်းတိုက်ပွဲနှင့်စပ်လျဥ်းသည့် စက်တင်ဘာ ၉ရက်တွင် ထုတ်ပြန်သော အစီရင်ခံစာတွင် အထက်ပါအတိုင်း ထည့်သွင်းဖော်ပြထားခြင်း ဖြစ်သည်။

“ယခုအခါ တိုက်ပွဲဝင်ရဲဘော်များသည် ထောင်တွင်း၌ ဖိနှိပ်မှုမျိုးစုံကို ကြံ့ကြံ့ခံရင်ဆိုင်နေရသည်။ အရိုက်အနှက်ဒဏ်ကြောင့် ထိခိုက်ဒဏ်ရာများရခြင်း၊ ခြေကျင်းခတ်ကာ တိုက်ပိတ်ခံရခြင်း၊ ထောင်ဝင်စာအပိတ်ခံရခြင်းနှင့် ထပ်တိုးအမှုများ ချမှတ်ခြင်းများရှိခဲ့သည်။ ထို့အပြင် နိုင်ငံရေးအကျဥ်းသားများ၏ တရားသဖြင့်ဆင်နွှဲသော ထောင်တွင်း တိုက်ပွဲများကို ထောင်အာဏာပိုင်များက အကျဥ်းသားအချင်းချင်းရန်ဖြစ်လေဟန် ပုံဖျက် ခြင်းများလည်းရှိခဲ့သည်။ ရန်သူက ထောင်တွင်းတိုက်ပွဲများကို ဖိနှိပ်ရာတွင် အကြမ်းနည်းရော အနုနည်းပါ သုံးလေ့ရှိသည်”ဟု အစီရင်ခံစာက ဆိုသည်။

လက်ရှိထောင်တွင်းတိုက်ပွဲသည် နှစ်ဘက်စလုံးအတွက် အလျော်အစားကြီးပြီး ထောင်အာဏာပိုင်နှင့် နိုင်ငံရေးအကျဥ်းသားများကြားတိုက်ပွဲမဟုတ်တော့ဘဲ စစ်အုပ်စုနှင့် နိုင်ငံရေးအကျဥ်းသားများကြားတိုက်ပွဲဖြစ်သောကြောင့် ထောင်တွင်းတိုက်ပွဲအောင်မြင်စေရန် ပြင်ပနိုင်ငံရေးလှုပ် ရှားမှုများ ကျယ်ပြန့်ပြင်ထန်ဖို့လိုကြောင်း ဗကသ များအဖွဲ့ချုပ်က ထောက်ပြသည်။

Public Service Announcement

အစာငတ်ခံတိုက်ပွဲဝင်နေသော နိုင်ငံရေးအကျဥ်းသားများကို ထောင်အာဏာပိုင်တို့က အခြားအကျဥ်းသားများနှင့် ရန်တိုက်ပေးလျှက်ရှိရာ သြဂုတ် ၉ရက်က နိုင်ငံရေးအကျဥ်းသားတစ်ဦး၏ထောင်ဝင်စာကို အခြားရာဇဝတ်အကျဥ်းသားတစ်ဦးက လွဲမှားရယူသည်ကို နိုင်ငံရေးအကျဥ်းသားများက ထိုင်သပိတ်ပြုလုပ် ဆန္ဒပြခဲ့ရာ အာဏာပိုင်များက လူရိုက်ပွဲဖန်တီးခဲ့သည်ဟု ဆိုသည်။

ထောင်အာဏာပိုင်များနှင့် ရာဇဝတ်အကျဥ်းသားများ ပူးပေါင်းရိုက်နှက်မှုကြောင့် ဗကသ ရဲဘော်များဖြစ်သည့် ကိုနိုင်ထက်အောင်၊ ကိုအောင်နိုင်သူတို့အပါအဝင် နိုင်ငံရေးအကျဥ်းသား (၁၅)ဦးထက်မနည်း ထိခိုက်ဒဏ်ရာများရခဲ့သည့်အပြင် နှစ်ယောက်တစ်တွဲခြေကျင်းခတ်ကာ ယနေ့အချိန်ထိ တိုက်ပိတ်ခံထားရကြောင်း ဗကသများအဖွဲ့ချုပ်၏ အစီရင်ခံစာတွင် ဖော်ပြသည်။

ထို့ကြောင့် နိုင်ငံရေးအကျဥ်းသားများအပေါ်စွဲဆိုထားသော ထပ်တိုးအမှုများအတွက် တရားရုံးထုတ်ရာတွင် ကိုအောင်နိုင်သူမှာ ဝှီးချဲဖြင့်ပင် ရုံးထုတ်ခံခဲ့ရသည်ဟုဆို သည်။

ယခုအစီရင်ခံစာတွင် အိုးဘိုထောင်တွင်းတိုက်ပွဲကိုသာ ရည်ညွှန်းဖော်ပြခဲ့သော်လည်း နိုင်ငံတစ်ဝှမ်းရှိ အကျဥ်းထောင်များတွင် အလားတူဖြစ်ရပ်များရှိနေခြင်းကြောင့် ပွင့်လင်းမြင်သာမှုနှင့် တရားမျှတမှုမရှိသော တရားစီရင်ရေးစနစ်ကို နှလုံးရည်သက်သက်ဖြင့် ကြံ့ကြံ့ခံသပိတ်မှောက် နေကြသော နိုင်ငံရေးအကျဥ်းသားများအား ထောက်ခံဝန်းရံပေးကြရန် တိုက်တွန်းထားသည်။

လက်ရှိအိုးဘိုထောင်တွင်းတိုက်ပွဲမှာ စစ်အုပ်စု ၏မတရားကွပ်မျက်ခြင်းကိုခံခဲ့ကြရသော ကိုဂျင်မီ၊ ကိုဖြိုးဇောယျာသော်၊ ကိုလှမျိုးအောင်နှင့် ကိုအောင်သူရဇော်တို့လေးဦးအတွက် ဝမ်းနည်းခြင်းအထိမ်းအမှတ်အဖြစ် ဇူလိုင် ၂၉ရက်တွင် အသံတိသပိတ်ပြုလုပ်ခဲ့ရာမှာ တဆင့်မြှင့်ကာ သြဂုတ် ၁ ရက်တွင် အစာငတ်ခံတိုက်ပွဲအဖြစ် စတင်ခဲ့ခြင်း ဖြစ်သည်။