'/%3E%3C/svg%3E){kind=small}
စစ်ကောင်စီတပ်သားနှစ်ဦးသေပြီး PDF ရဲဘော်တစ်ဦး ဒဏ်ရာရဟုဆို
မကွေးတိုင်း၊ ပေါက်မြို့နယ်၊ ဇီးပြားရဲစခန်းမှထွက်လာသည့် စစ်ကောင်စီတပ်သားများ ညောင်ရင်းကျေးရွာ၌ မိုင်းထိပြီး ဒေသတွင်းPDFများနှင့် ပစ်ခတ်မှုဖြစ်ပွားရာ နှစ်ဦးသေဆုံးကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့ခေါင်းဆောင် ကိုလကျ်ာက ပြောသည်။
ယနေ့(နိုဝင်ဘာ ၂၈ ရက်)နံနက်၇ နာရီ ၄၅မိနစ်ခန့်တွင် ပျူစောထီးများပါဝင်သည့် စစ်ကောင်စီတပ်သည် ဇီးပြားရဲစခန်းမှ ထွက်လာပြီး လမ်းတစ်လျှောက်တွင် ဒေသကာကွယ်ရေးတပ်ဖွဲ့များနှင့် ထိတွေ့ပစ်ခတ်မှုများ ဖြစ်ပွားခဲ့သည်။
အဆိုပါ စစ်ကောင်စီတပ်နှင့် ပျူများအား ညောင်ရင်းရွာတွင် မိုင်းပွိုင့် အနည်းဆုံး (၇)ပွိုင့်ဖြင့် တိုက်ခိုက်ခဲ့ပြီး လက်နက်ငယ်များနှင့် ပစ်ခတ်ခဲ့ကြရာ စစ်ကောင်စီတပ်သား နှစ်ဦးသေဆုံးပြီး ရှစ်ဦး ထိခိုက်ဒဏ်ရာရရှိကြောင်း မြိုင်(ပကဖ)ခေါင်းဆောင် ကိုလကျ်ာက ပြောသည်။
စစ်အုပ်စုမှာ အထိနာပြီး ညောင်းရင်းရွာမှ နေအိမ် ၈၆လုံး၊ ခဲပင်အင်းရွာမှ နေအိမ် ၆လုံး၊ ဂွေးဂုဏ်ရွာမှ နေအိမ် လေးလုံးတို့အား မီးရှို့ဖျက်ဆီးသွားခဲ့ကြောင်း ကိုလကျ်ာက ပြောသည်။
Public Service Announcement
အဆိုပါ စစ်အုပ်စုအား ဒရုန်းဖြင့် ထပ်မံတိုက်ခိုက်ရာ အများအပြားထိခိုက်၍ အုပ်စုလိုက် ထွက်ပြေးသွားကြောင်း၊ ယင်းတိုက်ခိုက်မှုတွင် ရဲဘော်တစ်ဦး ကျည်ထိမှန်ခဲ့ပြီး မစိုးရိမ်ရဒဏ်ရာရရှိခဲ့ကြောင်း မြိုင်(ပကဖ)အဖွဲ့က ပြောသည်။
“ထိတွေ့တာ တစ်ပတ်လောက်အတွင်း ၂၀ရက်ကနေ ဒီကနေ့အထိ အကြိမ်ရေပေါင်းများစွာ ဖြစ်ခဲ့တယ်။ အခုတော့ ပေါက်ဘယ်ကို စစ်ကြောင်းဦးတည်ပြီး ရုပ်သွားပြီ။ မြို့ပေါ်တော့မရောက်သေးဘူး။ မြို့နဲ့နီးတဲ့နေရာကို ရောက်နေတယ်။ ကိုယ့်အဖွဲ့တွေကလည်း စောင့်တော့စောင့်နေတာ။ ထိတွေ့မှုထပ်ဖြစ်မယ်မဖြစ်ဘူးတော့ ပြောလို့မရသေးဘူး။”ဟု ကိုလက်ျာက ပြောသည်။
ယနေ့ တိုက်ခိုက်မှုတွင် မြိုင်(ပကဖ) ရင်း – ၁၊YDF တပ်ဖွဲ့၊ မြို့ပြပြောက်ကျား ပခုက္ကူ၊ တောင်ညိုနဂါးတပ်ဖွဲ့၊ မြွေပွေးပြောက်ကျားတပ်ဖွဲ့၊ တိမ်လွှာမုတ်ဆိတ်အဖွဲ့၊ ကျေးရွာကာကွယ်ရေးတပ်ဖွဲ့များ- ပေါက် တို့နှင့်အတူ ပူးပေါင်းတိုက်ခိုက်ခဲ့ကြောင်း အသိပေးထားသည်။
စစ်အုပ်စုသည် ယမန်နေ့(နိုဝင်ဘာ ၂၇ ရက်)က ဇီးပြားရွာ အရှေ့မြောက်ဘက်ရှိ အောင်စည်သာကျေးရွာအား ဝင်ရောက်မီးရှို့ဖျက်ဆီးခဲ့ရာ နေအိမ် ၅၆လုံး မီးလောင်ဆုံးရှုံးခဲ့ပြီး ကျေးရွာပြည်သူများ မွေးမြူထားသော နွားနှင့်ဝက်များလည်း မီးလောင်ဆုံးရှုံးခဲ့သည်။
နိုဝင်ဘာ ၂၃ ရက်ကလည်း ပေါက်မြို့နယ် စသိန်းကျေးရွာအား စစ်ကောင်စီတပ်က မီးရှို့ဖျက်ဆီးခဲ့ရာ အိမ်ခြေ ၂၄၁လုံး မီးလောင်ပျက်စီးခဲ့ပြီး ဒေသတွင်းအဖွဲ့များနှင့်လည်း တိုက်ပွဲဖြစ်ပွားခဲ့သေးသည်။
