မန္တလေးတိုင်း ငါန်းဇွန်မြို့အထွက် စစ်ဆေးရေးဂိတ် လက်နက်ကြီးဖြင့် ပစ်ခတ်ခံရပြီးနောက် စစ်အုပ်စုက ဂိတ်အနောက်ဘက် မြစ်အတွင်းရှိ ကျွန်းပေါ်ကျေးရွာများအား ဝင်ရောက်ပစ်ခတ်ဖမ်းဆီးနေကြောင်း ဒေသခံများက ပြောသည်။
ယမန်နေ့ (ဒီဇင်ဘာ ၅ ရက်)က ငါန်းဇွန်မြို့အနောက်ဘက် မြင်းမူမြို့ဘက်အထွက်ရှိ စစ်ကောင်စီစစ်ဆေးရေးဂိတ်အား ဒေသကာကွယ်ရေးအဖွဲ့များက လက်နက်ကြီးဖြင့် ပစ်ခတ်တိုက်ခိုက်ခဲ့ကြသည်။
ညနေ ၃နာရီဝန်းကျင်တွင် ငါန်းဇွန်စစ်ဆေးရေးဂိတ်က စစ်အုပ်စုသည် ဂိတ်အနောက်ဘက် ဧရာဝတီမြစ်အတွင်းကျွန်းပေါ်ကျေးရွာများနှင့် စစ်ကိုင်းတိုင်းဘက်ခြမ်းသို့ (၆၀)မမ လက်နက်ကြီးဖြင့် ပစ်ခတ်ခြင်း၊ဒရုန်းဖြင့် အီနာဂါကြဲချခြင်းများ ပြုလုပ်ခဲ့ကြောင်း ဒေသခံများက ပြောသည်။
ထို့သို့ ပစ်ခတ်မှုကြောင့် စစ်ကိုင်းနှင့် မြင်းမူမြို့နယ် ဧရာ၀တီမြစ်ကမ်းဘေးတစ်လျှောက်ရှိ ကျေးရွာများမှ ပြည်သူများထွက်ပြေးတိမ်းရှောင်နေရကြောင်း ဒေသခံများက ပြောသည်။
Public Service Announcement
ထို့အပြင် စစ်အုပ်စုသည် ယနေ့(ဒီဇင်ဘာ ၆ရက်) နံနက်ပိုင်းတွင်လည်း မြစ်အတွင်း ကျွန်းပေါ်ကျေးရွာများအား ဝင်ရောက်မွှေနှောက်သွားခဲ့သည်။
“ငါန်းဇွန်စခဂိတ်ကို ဒေသခံကာကွယ်ရေးတပ်တွေက လက်နက်ကြီးနဲ့ပစ်တဲ့ ကိစ္စနဲ့ပတ်သက်ပြီး ငါန်းဇွန်ကျွန်းပေါ်ကို ဒီနေ့မနက်ပိုင်းမှာဝင်မွှေတာ။လူငယ်ပိုင်းတွေ ဘေးလွတ်ရာကိုရှောင်နေကြရတယ်”ဟု ဒေသခံတစ်ဦးက ပြောသည်။
ယမန်နေ့(ဒီဇင်ဘာ ၅ရက်) ငါန်းဇွန်မြို့အထွက် အနောက်ဘက်ဂိတ်ကို မြင်းခြံနှင့် ငါန်းဇွန်အခြေစိုက်ဒေသကာကွယ်ရေးအဖွဲ့များက (၄၀)မမ လက်နက်ကြီးဖြင့်သုံးကြိမ် ပစ်ခတ်တိုက်ခိုက်ခဲ့ခြင်း ဖြစ်သည်။
