PDF(ပြည်သူ့ကာကွယ်ရေးတပ်)များကြောင့် တိုင်းပြည်ကို စစ်တပ်မထိန်းချုပ်နိုင်ဟု အာဏာသိမ်းခေါင်းဆောင်ဝန်ခံပြီးနောက် ပြည်တွင်းရွှေဈေးတက်လာပြီး အခေါက်ရွှေ တစ်ကျပ်သားကို ၂၉ နီးပါးအထိ့ဈေးရောက်လာကြောင်း ပြည်တွင်းရွှေဈေးကွက်မှ ရောင်းဝယ်သူများကပြောသည်။
စစ်အုပ်စုဦးဆောင်ကျင်းပခဲ့သည့်ကာလုံအစည်းအဝေးတွင် အာဏာသိမ်းစစ်ခေါင်းဆောင်က NUG ၊PDFများကြောင့် တိုင်းပြည်ကို မထိန်းချုပ်နိုင်သေးကြောင်း ဝန်ခံပြောကြားခဲ့ပြီးနောက်ယခုလိုရွှေဈေးတက်လာခြင်းဖြစ်သည်။
ဇန်နဝါရီ ၃၀ရက်နေ့လယ် ၂နာရီက အခေါက်ရွှေတစ်ကျပ်သားကို ကျပ် ၂,၈၄၅, ၀၀၀ ပေါက်ဈေးရှိခဲ့ပြီးစစ်ကောင်စီ၏ကာလုံအစည်းအဝေးသတင်းထုတ်ပြန်ပြီးနောက်ဖေဖော်ဝါရီ ၂ ရက်တွင်အခေါက်ရွှေတစ်ကျပ်သား ၂,၈၈၂,၀၀၀ ကျပ်အထိပေါက်ဈေးရှိလာသည်။
“အခေါက်ရွှေတစ်ကျပ်သားကို ကျပ် သိန်း ၃၀ကျော်ဖို့ အထိဖြစ်လာဖို့ မှန်းထားကြတယ်။ ရွှေဆိုင်တွေကလည်း အတက်ဈေးကြောင့် ရောင်းတာပဲရှိပြီး အဝယ်မရှိဘူး”ဟု ရွှေလုပ်ငန်းရှင်တစ်ဦးကပြောသည်။
ရွှေဈေးမြင့်တက်လာခြင်းမှာ ကမ္ဘာရွှေဈေး အနည်းငယ်မြင့်တက်လာခြင်းကြောင့်လည်းပါဝင်သော်လည်း အဓိကမှာ နိုင်ငံရေးအခြေအနေကြောင့် ဈေးနှုန်းမတည်မငြိမ်ဖြစ်နေခြင်းဖြစ်သည်ဟု ရန်ကုန်အခြေစိုက်ရွှေလုပ်ငန်းရှင်တစ်ဦးကပြောသည်။
ကမ္ဘာ့ရွေဈေးသည် ဖေဖော်ဝါရီ ၂ ရက်တွင် တစ်အောင်စကိုဒေါ်လာ ၁၉၅၅ ရှိသည်။ သို့သော်စစ်ကောင်စီက ပြည်တွင်းရွှေဈေး မတက်စေရန် ရန်ကုန်၊ မန္တလေးနှင့်မော်လမြိုင်တို့ရှိ ရွှေအသင်းများက တဆင့် အခေါက်ရွှေတစ်ကျပ်သားလျင် ကျပ် ၂၇ သိန်းအောက်တွင် သာရှိသည်ဟု လိမ်လည်ဝါဒဖြန့်ထားသည်။
စစ်ကောင်စီအလိုကျဆောင်ရွက်ပေးနေသည့် ရန်ကုန်တိုင်းရွှေလုပ်ငန်းရှင်များအသင်းကယနေ့ အခေါက်ရွှေတစ်ကျပ်သားကျပ် ၂၃ သိန်းသာရှိသည်ဟုထုတ်ပြန်ထားသည်။