ဖိလစ်ပိုင်နိုင်ငံတွင် ကြက်သွန်နီပြတ်လပ်နေမှုကိုအခွင့်ကောင်းယူပြီး စစ်ကောင်စီက ပြည်တွင်းကြက်သွန်များတင်ပို့ကာ နိုင်ငံခြားငွေရရန် ကြံစည်နေကြောင်း စီးပွားရေးလုပ်ငန်းရှင်များကပြောသည်။
ဖိလစ်ပိုင်နိုင်ငံတွင် ကြက်သွန်နီပြတ်လပ်တေပြီးဈေး အဆမတန်မြင့်တက်လာပြီးနောက် စစ်ကောင်စီက ထိုအခွင့်အရေးကို ရယူကာ နိုင်ငံခြားငွေရရှိရန် ပြည်တွင်းကြက်သွန်နီများကို ဖိလစ်ပိုင်နိုင်ငံသို့ တင်ပို့ရန် စီစဉ်နေခြင်းဖြစ်သည်။ ဖိလစ်ပိုင်နိုင်ငံတွင် မုန်တိုင်းဒဏ်ကြောင့် ကြက်သွန်နီဈေး အဆမတန်မြင့်တက်နေပြီး ကြက်သွန်နီတစ်ကီလိုကို အမေရိကန်ဒေါ်လာ ၁၅ ဒေါ်လာကျော်ပေးဝယ်နေရခြင်းဖြစ်သည်။
စစ်ကောင်စီခန့် စီးပွားရေးနှင့်ကူးသန်းရောင်းဝယ်ရေးဝန်ကြီး ဦးအောင်နိုင်ဦးက မြန်မာနိုင်ငံတွင် ကြက်သွန်နီဧက ၁ ဒသမ ၇ သိန်းကျော်စိုက်ပျိုးပြီး နှစ်စဉ်တန်ချိန် တစ်သန်းကျော် ထွက်ရှိနေသည်ဟုဆိုကာပြည်ပအမြောက်အများတင်ပို့ရန် စီစဉ်နေသည်ဟု စစ်အုပ်စုအစည်းအဝေးတွင်ပြောကြားခဲ့သည်။
စစ်အုပ်စုနှင့် ကြက်သွန်နီ၊ ကြက်သွန်ဖြူနှင့်စားဖိုဆောင်သုံး သီးနှများ စိုက်ပျိုးထုတ်လုပ်တင်ပို့ရောင်းချသူများအသင်းတို့ ဖေဖော်ဝါရီ ၁၄ ရက်က တွေ့ဆုံပြီးနိုင်ငံခြားငွေရရှိရန် စစ်ကောင်စီက ကြက်သွန်နီတင်ပို့ရန် စီစဉ်နေသည်။
Public Service Announcement
စစ်ကောင်စီသည် နိုင်ငံခြားငွေရရှိရန် ပြည်တွင်းစားသုံးမှုဖူလုံရေးကို ဂရုမစိုက်ဘဲ စိုက်ပျိုးရေးသီးနှီးများကိုပြည်ပနိုင်ငံများကို အလွန်အကျွံတင်ပို့နေပြီး စစ်အုပ်စုနှင့် နီးစပ်သည့်လုပ်ငန်းရှင်များကပါ အလိုတူအလိုပါဆောင်ရွက်နေခြင်းဖြစ်သည်ဟုစီးပွားရေးလုပ်ငန်းရှင်တစ်ဦးကပြောသည်။
“ပြည်တွင်းမှာ ရောင်းတာထက် ပြည်ပမှရောင်းရင်ငွေပို့ရကြတော့ လုပ်ငန်းရှင်တွေက ကိုယ်ကျိုးအတွက် စားနပ်ရိက္ခာတွေကို ပြည်ပပို့ဖို့ စစ်အစိုးရကို တွန်းအားပေးနေတာ။ သူတို့ကလည်း ဒေါ်လာလိုနေတော့ နှစ်ဦးနှစ်ဖက် အဆင်ပြေနေကြတာပေါ့။ ပြည်သူတွေ စားနပ်ရိက္ခာဖူလုံလား မဖူလုံလား သူတို့ မစဉ်းစားကြဘူး ”ဟု စီးပွားရေးလုပ်ငန်းရှင်တစ်ဦးကပြောသည်။
မြန်မာနိုင်ငံတွင် ကြက်သွန်နီကို စစ်ကိုင်းတိုင်း၊ မကွေးတိုင်း၊မန္တလေးတိုင်းတို့တွင် အများဆုံးစိုက်ပျိုးပြီးနှစ်စဉ်ကြက်သွန်နီတန်ချိန် တစ်သိန်းမှ နှစ်သိန်းကြားကို ပြည်ပတင်ပို့နေခြင်းဖြစ်သည်။စစ်အုပ်စု၏အာဏာသိမ်းမှုကြောင့် စစ်ကိုင်၊မကွေးတိုင်းရှိ မြို့နယ်အများစုတွင် တိုက်ပွဲများဖြစ်ပွားခြင်း၊စစ်ကောင်စီတပ်ကစစ်ကြောင်းထိုး၍ နေအိမ်များမီးရှို့ဖျက်ဆီး ၊အကြမ်းဖက်၍ပြည်သူများရွာတွင်မနေနိုင်ဘဲထွက်ပြေးနေရသဖြင့် ကြက်သွန်နီစိုက်ပျိုးထုတ်လုပ်မှု မည်မျှလျော့ကျသည်ကို မသိရသော်လည်း စစ်ကောင်စီက ကြက်သွန်နီပြည်ပတင်ပို့ခွင့် ယခင်ထက်ပို၍ ခွင့်ပြုနေခြင်းဖြစ်သည်။
အာဏာသိမ်းစစ်ကောင်စီက ကြက်သွန်နီကို ပြည်ပသို့ အလွန်အကျွံတင်ပို့နေခြင်းကြောင့် ပြည်တွင်းကြက်သွန်နီ ဈေးမြင့်တက်လာပြီး တပိဿာကို ကျပ် ၅၀၀၀ ခန့်အထိပြီးခဲ့သည့်နှစ်နိုဝင်ဘာတွင် စံချိန်တင်မြင့်တက်ခဲ့သည်။
နိုင်ငံခြားငွေအသဲအသန်လိုအပ်နေသောစစ်ကောင်စီက ကြက်သွန်နီကို ဘင်္ဂလားဒေ့ရှ်၊ ထိုင်း၊ဗီယက်နမ်နှင့်တရုတ်နိုင်ငံများသို့ အပါတ်စဉ် တင်ပို့နေခြင်းကြောင့် ပြည်တွင်းဈေးကွက်အတွင်း ကြက်သွန်နီရှားပါးလာကာဈေးမြင့်တက်လာခြင်းဖြစ်သည်ဟု ကုန်သည်များကပြောကြားခဲ့သည်။
ပြည်တွင်း၌ ၂၀၂၂ မေလတွင် ကြက်သွန်နီ တစ်ပိဿာလျှင် ကျပ် ၁၀၀၀ ခန့်သာရှိခဲ့သည်။ ၂၀၂၂ နိုဝင်ဘာတွင်ကြက်သွန်နီ တပိသာကို ကျပ် ၅၀၀၀ခန့်ထိတက်ခဲ့သည်။ ၂၀၂၃ ဖေဖော်ဝါရီလတွင် ကြက်သွန်နီပေါ်ချိန်ရောက်လာသဖြင့်ဈေးပြန်ကျသော်လည်းရန်ကုန်တွင် လက်လီတစ်ပိသာလျှင်ကျပ် ၃၀၀၀ ခန့်ရှိနေဆဲဖြစ်သည်။
ယခုအခါ ဖိလစ်ပိုင်နိုင်ငံက ကြက်သွန်တန်ချိန်နှစ်သောင်းကို ပြည်ပက တင်သွင်းမည်ထုတ်ပြန်ရာ စစ်ကောင်စီကဖိလစ်ပိုင်သို့ကြက်သွန်နီတင်ပို့၍ နိုင်ငံခြားငွေရှာဖွေရန်ကြိုးစားနေခြင်းဖြစ်သည်။
ကုန်သွယ်မှုနှင့် ပြည်ပရင်းနှီးမြှပ်နှံမှုလျော့ကျသွားပြီး ဒေါ်လာအရနည်းလာသဖြင့်စစ်ကောင်စီက နိုင်ငံတစ်ဝန်းပြည်သူများ၏ ခုခံစစ်ပွဲများတွင် တိုက်ခိုက်ရန် လေယာဥ်ဆီအပါအဝင် လက်နက်ခဲယမ်းများဝယ်ယူရန် နိုင်ငံခြားငွေကိုရနိုင်သလောက်ရှာဖွေနေသည်။
