မြိုင်တွင် သရက်ကွပျူရွာလာသည့် စစ်အုပ်စုယာဉ် အား ဒေသကာကွယ်ရေးတပ်များ အနီးကပ်ပစ်ခတ်တိုက်ခိုက်

မကွေးတိုင်း၊ မြိုင်မြို့နယ်တွင် သရက်ကွပျူစောထီးကျေးရွာသို့ လာသည့် စစ်အုပ်စုလိုက်ပါလာသော ဖောကားယာဉ်တစ်စီးအား အနီးကပ်ပစ်ခတ်တိုက်ခိုက်ရာ ကားလမ်းဘေးထိုးကျပြီး ထိခိုက်သေဆုံးမှုများနိုင် ကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့ (ပကဖ)ခေါင်းဆောင် ဗိုလ်လက်ယျာက ​ပြောကြားသည်။

ယနေ့ (မေလ ၄ ရက်) နံနက် ၁၀နာရီခန့်က မြိုင်မြို့အနီး စက်မှု(၂)မှ ထွက်လာသော ဖောကားယာဉ်ပေါ်တွင် စစ်ကောင်စီတပ်သားများနှင့် ပျူစောထီးများ လိုက်ပါလာပြီး လမ်းဘေးတွင် ကင်းပုန်းများချထားလျက် သရက်ကွပျူရွာသို့ ထွက်လာခဲ့သည်။

စလင်းကန်ကျေးရွာအကျော် ကင်းပုန်းအားနည်းသောနေရာအရောက်တွင် ဒေသကာကွယ်ရေးရဲဘော်များက ၁၀မိနစ်ကျော်ကြာ လက်နက်ငယ် များဖြင့် ပစ်ခတ်တိုက်ခိုက်ခဲ့ရာ ဖောကားမှာ လမ်းဘေးသို့ထိုးကျသွားကြောင်း၊ အနီးကပ်ပစ်ခတ်ခဲ့၍ ထိခိုက်သေဆုံးမှု များပြားနိုင်​ကြောင်း မြိုင်( ပကဖ) ခေါင်းဆောင် ဗိုလ်လက်ယျာက ​ပြောကြားသည်။

သို့သော် ကင်းပုန်းများ ရောက်ရှိလာခြင်း၊ စက်မှု (၂)နှင့် မြိုင်မြို့မှ စစ်ကူများလာခြင်းတို့ကြောင့် ရဲဘော်များ အထိအခိုက်မရှိ ပြန်လည်ဆုတ်ခွာခဲ့ကြောင်း မြိုင်(ပကဖ)အဖွဲ့က အသိပေးသည်။

Public Service Announcement

“ခဲယမ်း ရိက္ခာသယ်တာဖြစ်မယ်။ အင်အားဖြည့် တာလည်းဖြစ်မယ်။ သရက်ကွရွာက မြိုင်မြို့နဲ့နီးတယ်။ ကားကတော့ ခုထိမသယ်နိုင်သေးဘူး”ဟု ဗိုလ်လက်ယျာက ​ပြောကြားသည်။

သရက်ကွပျူရွာကိုလည်း လက်နက်ကြီးအဖွဲ့များက ၁၀ချက်ကျော် ပစ်ခတ်ခဲ့သည်ဟု ဆိုသည်။

အဆိုပါ စစ်ဆင်ရေးကို မြိုင်(ပကဖ)အဖွဲ့ဝင်များဖြစ်သော ဝံပုလွေအဖွဲ့၊ ဇေယျာသီအဖွဲ့၊ အညာမြေပြောက်ကျားအဖွဲ့၊ ချင်းတွင်းပြောက်ကျားအဖွဲ့ ၊ ပခုက္ကူခရိုင် PDFရင်း (၁)ဆယ့်သုံးတပ်ဖွဲ့၊ စကော်ပီယန်အဖွဲ့ ၊ MVP အဖွဲ့ ၊ MRTF အဖွဲ့တို့ပူးပေါင်းတိုက်ခိုက်ခဲ့ကြောင်း အသိပေးထားသည်။

ထို့အပြင် မြိုင်(ပကဖ)နှင့် မဟာမိတ်အဖွဲ့များသည် မေလ ၂ ရက်ကလည်း သရက်ကန်ပျူစောထီးစခန်းနှင့် စိုကန်တိုက်ပျူရွာကြားတွင် ပျူစောထီးများအားမိုင်းဆွဲခြင်း၊ ဒရုန်းဖြင့်အီနာဂါခြင်းများဖြင့် တိုက်ခိုက်ခဲ့ရာ ရဲတပ်ကြပ်တစ်ဦးနှင့် ပျူတစ်ဦးသေဆုံးခဲ့ကြောင်း သတင်းထုတ်ပြန်ထားသည်။