‘တိမ်ပျံစစ်ဆင်ရေး’အဖြစ် မန္တလေးနန်းတွင်းရှိ စစ်ကောင်စီတပ်ကို နည်းပညာမြင့်ပစ္စည်းများအသုံးပြု၍ နှစ်ကြိမ်တိုက်ခိုက်ခဲ့ကြောင်း Generation Z Power-GZP မြို့ပြပြောက်ကျားတပ်ဖွဲ့မှ တာဝန်ရှိသူတစ်ဦးက ပြောသည်။
ဇွန်လ ၂၆ ရက် ည ၁၁ နာရီခွဲက နန်းတွင်းရှိ စစ်ကောင်စီတပ်ကို GZP(Mandalay)နှင့် Peacock Warrior Force(မတ္တရာ)အဖွဲ့တို့ပူးပေါင်းပြီး နည်းပညာမြင့်ပစ္စည်းများအသုံးပြု၍ နှစ်ကြိမ်တိုက်ခိုက်ခဲ့ခြင်း ဖြစ်သည်။
“(နန်းတွင်းရှိ)တိုင်းမှူးနဲ့ ဒုတိုင်းမှူးအိမ်တွေကို အဓိကပစ်မှတ်ထား တိုက်ခိုက်ခဲ့တာပါ။ ပစ်မှတ် ထိရောက်မှုရှိပါတယ်”ဟု GZP(Mandalay)ပြောက်ကျားတပ်ဖွဲ့မှ တာဝန်ရှိသူတစ်ဦးက People’s Springသို့ ပြောသည်။
အဆိုပါတိုက်ခိုက်မှုတွင် စစ်ရေးပစ်မှတ်များအား ထိရောက်အောင် ပစ်ခတ်နိုင်ခဲ့၍ စစ်တိုင်းမှူးနှင့် ဒုစစ်တိုင်းမှူးတို့၏ နေအိမ်အဆောက်အအုံများ ထိခိုက်မှုရှိပြီး လူထိခိုက်သေဆုံးမှုရှိ၊ မရှိ ဆက်လက်စုံစမ်းဆဲဖြစ်ကြောင်း ၎င်းတာဝန်ရှိသူက ဆက်ပြောသည်။
Public Service Announcement
တိမ်ပျံစစ်ဆင်ရေးအဖြစ် စစ်ကောင်စီ အလယ်ပိုင်းတိုင်းစစ်ဌာနချုပ်တည်ရှိရာ မန္တလေးနန်းတွင်းသို့ တိုက်ခိုက်မှုနှင့်စပ်လျဥ်းပြီး NUG အစိုးရ၊ ကာကွယ်ရေးဝန်ရှိဌာနက ထုတ်ပြန်ရာတွင်လည်း GZP(Mandalay)နှင့် Peacock Warrior Force(မတ္တရာ)အဖွဲ့များက နည်းပညာမြင့်ပစ္စည်းများဖြင့် လေကြောင်းတိုက်ခိုက်မှု နှစ်ကြိမ်ပြုလုပ်ခဲ့ကြောင်း ဖော်ပြသည်။
