'/%3E%3C/svg%3E){kind=small}
မိထက်/People’s Spring
ဖားကန့်ဒေသတွင် ကချင်လွတ်လပ်ရေးအဖွဲ့(KIO)နှင့် စီးပွားရေးလုပ်ငန်းရှင်အချို့ အကျိုးတူ တူးဖော်သည့်ကျောက်စိမ်းလုပ်ကွက်မှ တန်ဝက်နီးပါး အလေးချိန်ရှိ ဘီလီယံချီတန်ကြေးရှိသော ကျောက်စိမ်းတုံး တူးဖော်ရရှိခဲ့ကြောင်း မြေပြင်သတင်းရင်းမြစ်များက ပြောသည်။
ဖားကန့်မြို့ ၊ဆိပ်မူအုပ်စု၊ ဝှေခါကျေးရွာရှိ ဝှေခါမှော်တွင် တူးဖော်ရရှိခြင်းဟု ဒေသခံတစ်ဦးက ပြောသည်။
” KIO နဲ့ လုပ်ငန်းရှင်တချို့ပါတယ်။ ကျောက်ကို ဖားကန့်ကနေ သယ်ထုတ်သွားပါပြီ။ ပြည်တန် ကျောက်လို့ ပြောကြတယ်။ နောက်ပြီး ကျပ်ငွေ ၅ ဘီလီယံလောက်တန်တယ်ကြားတယ်”ဟု အဆိုပါဒေသခံက ပြောသည်။
Public Service Announcement
တူးဖော်ရရှိသောကျောက်စိမ်းတုံးသည် တန်ဝက်ခန့်အလေးချိန်ရှိပြီး ကျောက်အရည်အသွေးအလွန်ကောင်းကြောင်း၊ ပြီးခဲ့သည့်ဧပြီက တွေ့ရှိခဲ့ခြင်းဖြစ်ပြီး ယခုအခါ အရောင်းအဝယ်ကိစ္စပြီးမြောက်သွားပြီဟု ဖားကန့်ဒေသခံ လောပန်းတစ်ဦးက ပြောသည်။
” တရုတ်အထိ ရောက်သွားပါပြီ။ ဒီကထွက်တဲ့ ကျောက်စိမ်းမှန်သမျှ တရုတ်မှာပဲ ဈေးကွက် ကောင်းတာ”ဟု ၎င်းက ပြောသည်။
အဆိုပါကျောက်စိမ်းတုံးမှ ရရှိသည့်ငွေကြေးကို စစ်အာဏာရှင်တော်လှန်ရေးတွင် အသုံးပြုပေးရန်လည်း ဒေသခံများက မှတ်ချက်ပေးသည်။
” တော်လှန်ရေးအတွက် ထိရောက်တဲ့နေရာတွေမှာ ပြန်သုံးစေချင်တယ်။ ဒါကိုလည်း KIOအစိုးရအနေနဲ့ တစ်ခုခုထွက်ပြောစေချင်တယ်”ဟု ဖားကန့်ဒေသခံတစ်ဦးက ပြောသည်။
လက်ရှိတွင် ဖားကန့်ဒေသ၌ စစ်ကောင်စီအပြင် KIOပါ ကျောက်စိမ်းတူးဖော်ရေးစီမံကွပ်ကဲကြောင်း ဒေသခံများက ပြောသည်။
ကျောက်စိမ်းတုံးတူးဖော် တွေ့ရှိမှုနှင့်ပတ်သက်၍ KIO/KIA ပြောရေးဆိုခွင့်ရှိသူ ဗိုလ်မှူးကြီးနော်ဘူထံ ဆက်သွယ်မေးမြန်းရန်ကြိုးစားသော်လည်း ဖုန်းအဆက်အသွယ် မရရှိသေးပေ။
