ဟန်နွေ/People’s Spring
ချင်းပြည်နယ် ထန်တလန်မြို့ကို ချင်းအမျိုးသားတပ်မတော်(CNA)နှင့် ချင်းဒေသကာကွယ်ရေးတပ်(CDF) ပူးပေါင်းတပ်များက ဝိုင်းထားပြီး လက်ကျန် စစ်ကောင်စီတပ်ဖွဲ့များ ကင်းစင်အောင် ဆက်လက်တိုက်ခိုက်နေဆဲဖြစ်ကြောင်း CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
CNAနှင့် CDFများစုဖွဲ့ထားသည့် ချင်းပြည်ကောင်စီ ပူးပေါင်းတပ်များသည် ထန်တလန်မြို့ သိမ်းပိုက်နိုင်ရေး ဇူလိုင် ၂၂ရက်မှစတင်ထိုးစစ်ဆင်နေခြင်းဖြစ်သည်။
Public Service Announcement
လက်ရှိတွင် ထန်တလန်မြို့တွင်းရှိ စစ်ကောင်စီအထိုင်စခန်းကို သိမ်းပိုက်ထားပြီးဖြစ်သကဲ့သို့ ဟားခါးနှင့် ထန်တလန်ကြားရှိ စစ်ကောင်စီတပ်စခန်းများကိုလည်း ချင်းပြည်ကောင်စီ ပူးပေါင်းတပ်က သိမ်းပိုက်ထားသည်။
လက်ရှိတွင် ထန်တလန်မြို့တွင်းရှိစစ်ကောင်စီတပ်များသည် တိုက်တာ အဆောက်အဦးနှင့် ဘုရားကျောင်းများ၌ ခိုလှုံနေပြီး စစ်ကောင်စီဘက်ကလည်း လေကြောင်းမှ ခဲယမ်း၊ရိက္ခာဖြည့်တင်းလျက်ရှိဟု ဆိုသည်။
” ဩဂုတ် ၁၂ရက်ကနေ့ကတော့ ဟားခါးမြို့အဝင် အဲဒီမှာတော့ တောင်တစ်ခုသိမ်းလိုက်တယ်။ အဲဒီဟာက ဟားခါးကနေထန်တလန်ဘက်ကို စစ်ကူမလာနိုင်အောင်ပေါ့။ မြေပြင်ကနေ စစ်ကူပို့တာတော့မရှိဘူး။ လေယာဉ်ကနေတဆင့်ကျည်ဆံတွေ စားနပ်ရိက္ခာတချို့တော့လာချပေးတာရှိတယ်။ကျနော်တို့ကလည်းထန်တလန်မြို့ကို အားလုံးက ဝိုင်းထားတယ်”ဟု ဆလိုင်းထက်နီက လက်ရှိထန်တလန် အခြေအနေကို ယနေ့ (ဩဂုတ် ၁၄ရက်)တွင်ပြောပြသည်။
ချင်းပြည်ကောင်စီ ပူးပေါင်းတပ်ဖွဲ့များ၏ ဦးတည်ချက်မှာ ထန်တလန်မြို့တွင်းရှိ စစ်ကောင်စီတပ်များ အမြန်ဆုံးကင်းစင်နိုင်အောင် တိုက်ပွဲဆင်နွှဲနေခြင်းဖြစ်သည်ဟု ၎င်းကဆိုသည်။
ဇူလိုင် ၂၂ရက်မှ ဩဂုတ်၁၄ရက်အထိ ဟားခါး-ထန်တလန်ကြားနှင့်ထန်တလန်မြို့ရှိစစ်ကောင်စီ စခန်း ၈ခုထက်မနည်းကို ချင်းပူးပေါင်းတပ်က သိမ်းပိုက်ရရှိထားသည်။
